Krismas Bazar-ah lehkhabu

Krismas Bazar-ah lehkhabu hi hnawng tura ngaih a awl ang a, hetia han ngaihtuah mai chuan lehkhabu zawrhna hun thaa ngaih pawh a ni lo ang. Mahse chutiang a ni ngawt lo.
Mizoramah December hi lei leh hralh hun a ni a, bazar a lun thin. ‘Krismas Bazar’ a piang a, mi an bazar suau suau thin tiin a sawi theih ang. Chu bazar-ah chuan lehkhabu an hralh hnem sawt tlat asin!
Aizawla sumdawnna hmun pawimawh, Dawrpui pheiah lehkhabu dawr panga a awm a, December-ah khan an inhralh tha, thalaiin lehkhabu an lei sup sup an ti. Instagram lama lehkhabu zuarte pawhin December-ah an inhralh tha tih an sawi.
Mi nawlpuiin ‘Lehkha chhiar kan thatchhia, lehkhabu kan chhiar tlem,’ tia an sawi thin laiin lehkhabu zuarte chuan ngaihdan dang an nei hrim hrim a, lehkha chhiar kan thatchhia an ti ve lo, thalaiin lehkhabu an lei ngai lo an ti hek lo. Chu chu December ni lo thla dangah pawh an ngaihdan a ni. Amaherawhchu, lehkhabu hralh tla a awm reng lo a, kum tluana inhralh tha chu an ni lo tih chu an sawi.
Lehkhabu zuarte hian kum liam ta December-ah khan an lehkhabu hralh zat a pung tih an sawi a, November leh a hma thlate aiin inhralh a nuam tih an sawi hlawm. Lehkhabu leitu tam ber chu thalai an ni tih an sawi vek bawk.
An sawi danin, zirlaibu hralh hun a awm a, chutiangah chuan zirlaibu leh a kaihhnawih lam an hralh tha. December-ah chuan zirlai lam ni lo lehkhabu chi dang an hralh tha thin. Mizo tawng lehkhabu leh English lehkhabu an hralh ve ve tih an sawi a, Mizo tawng lehkhabu hralh zat a pung dawrh tih an sawi bawk.
Thla liam ta December-ah khan Mizo tawng lehkhabu hralh tla zual bu ruk vel a awm tih an sawi a, a dang pawh a hma aiin an hralh tha tih pawh an sawi.
Sunday School zirlai, Nilaini Zan leh Beihrual thupui leh diary bute hralh hun a ni a, chung chu an hralh that bakah Mizo lehkhabu dang an hralh zat a pung nasa tih an sawi. Dawr thenkhat phei chuan tun December-a an hralh zat kha, tam an ti a, mak an ti zawk tih an sawi.
“|halai hian chawlh laia chhiar tur an lei a, a thenin kum thara chhiar tur an rawn zawng a,” tiin lehkhabu dawr pakhat chuan an sawi a, lehkhabu dawr dang pakhat chuan ni 23 leh ni 24 khan haw hma tuma inhawng an ni a, mahse dawrtu an ngah avangin an nileng tih an sawi. No Vehicle Zone puan a nih pawh khan lehkhabu an hralh hnem phah tih an sawi hlawm.
Instagram lama zuar thin Chhuantea (Lehkhabuk) pawhin, “December-ah hian kan hralh hnem sawt thin a, tun December-ah pawh khan kan hralh zat a pung,” a ti a, “November velah khan inhralh a har a, December-ah a pung ta dawrh a,” a ti bawk.