Sanctuary-a bigha 6,200-a zaua dan lova chengte um chhuak

Sanctuary-a bigha 6,200-a zaua dan lova chengte um chhuak
Assam sorkarin dan lova sorkar ram luahtute hnawh chhuah hna a kalpui mek zelah Thawhlehni khan Burhachapori Wildlife Sanctuary-a dan lova chenna hmun bigha 6,200 (hectare 830 dawn)-a zaua mite um chhuak lehin chhungkaw 710 an tling tih thuneituten an sawi.
Thawhtanni tuk atanga ramngaw chhung, Sonitpur leh Nagaon district huam chhunga mite hnawh chhuah hna thawh hi Thawhlehni tlai khan an zo fel tih Sonitpur District Commissioner Ananda Kumar Das-a’n a sawi.
“Chhungkaw 710 vel ramngaw huam chhunga bigha 6,200-a zau, wildlife sanctuary humhalh laiah an lo khawsa a. Ni hnih chhung beihpui thlaknaah thuneituten hlawhtling takin an um chhuak a, ram pawh chhuah zalen a ni ta a ni,” a ti.
Dan lova ram luahtute um chhuah hna hi Tezpur Sadar leh Dhekiajuli revenue circle huam chhung, Jamuktol, Arimari, Siyalichar, Baghetapu, Galatidubi, Lathimari, Kundulichar, Purba Dubramari leh Batulichar-ah an thawk a ni.
Ram lo luahtute hian Burhachapari Wildlife Sanctuary huam chhungah in an sa a, thlai chingin lo zau tak an lo nei hlawm bawk niin Das-a chuan a sawi.
A mi cheng tam zawk hian an inte chu thiatin an bungruate pawh anmahni vekin hmun dangah an thiar sawn a. Mi thenkhat erawh chu khaw vawt tak avanga insaseng mai remchang lo niin an thlai chin mekte an seng hnuah insawn turin thuneitute nen an inrem siam a ni.
“Ram luahtute hian thlasik lai chuan hnawt chhuak lo turin an ngen a; mahse, thuneitute hian an phalsak hlawm lo va, dan lova ramngawa an lo awm avangin chhuak ngei turin an ti a ni,” tiin Das-a chuan a sawi.
Sonitpur Senior Superintendent of Police Barun Purakayastha-a chuan mihring an um chhuahte atang hian dodalna a awm lem lo niin a sawi bawk.
Dan lova sorkar rama awmte um chhuah chungchangah hian Chief Minister Himanta Biswa Sarma chuan, “Rorelna chu a chiang a, kan ram leh kan culture hi in luah thei lo vang, JCB a lo thlen chuan in tah a ngai dawn a, lo insaseng rawh u,” tiin X-ah a tar lang a ni.
Assam-a dan lova ram luahte um chhuah beihpui thlak lian ber pakhatah nikum February khan Burhachapori Wildlife Sanctuary-ah hian hectare 2,099-a zaua cheng mi 12,800 vel um chhuah an lo ni tawh.
July thla khan sanctuary-a let leh tum leh forest guard-te intihbuaina chhuakin mi pakhat a thi a, mi dang pasarih velin hliam an lo tuar tawh bawk.
Burhachapori Wildlife Sanctuary hi Brahmaputra chhim lam kama sq km 44.06 bial a ni a, Guwahati atanga khawchhak lam km 180 vel, Tezpur chhim kam km 40 vela hla a ni.
Sanctuary-ah hian samak ki khat nei, sakei, keite, ram sial, ram sakhi, sanghal leh sai tam tak an cheng a. Sava pawh mang hlauhawm tak tak zinga mi – Bengal florican, black-necked stork, mallard, open billed stork, teal leh whistling duck te an cheng bawk.
Sonitpur district forest department hnuaia awm niin kum 1974 atang khan reserve forest a ni a, wildlife sanctuary-ah hian July, 1995 khan puan a ni.