Punjab leh Karnataka zuiin Jharkhand-in VB-G RAM G duh lo

Jharkhand chuan Punjab leh Karnataka hnungzuiin sorkar laipuiin inhlawhna tur dan a siam thar, Viksit Bharat–Guarantee for Rozgar and Ajeevika Mission (Gramin) Act (VB-G RAM G Act) an duh loh thu an sawi chhuak veleh ta.
Chief Minister Hemant Soren-a chuan Thawhlehni khan VB-G RAM G Act chu a hmaa hman, ni 100 inhlawhna tia hriat lar, Mahatma Gandhi National Rural Employment Guarantee Act (MGNREGA) tihdanglam tumna hrim hrim rilru atanga chhuak a nih thu a sawi a, thingtlang miten hna an neih ve theihna kalphung tihtawp chu pawm theih a ni lo tih a sawi a ni.
Sorkar laipui hian tun hnai khan Congress kaihhruai UPA sorkarin kum 2005-a a siam, MGNREGA thlak nan VB-G RAM G hi hi a phar a ni.
Soren-a chuan dan thar ruahman chungchanga a ngaih dan hi Thawhlehnia economist hriat hlawh tak, Jean Dreze nen an inkawm hnuah X-ah a tar lang a ni.
“MGNREGA khawih bawrhban tumna ang hrim hrim rilru hi pawm theih a ni lo,” tiin chief minister hian a tar lang.
Jharkhand Mukhti Morch (JMM) hruaitu hian sorkar laipuiin MGNREGA kalphung thlak a tumna hi thinga mi retheite dikna chanvo chiang taka beihna a nih thu a sawi.
“Hlawh, hna thawh tur leh state-te chanvo tur engmah chiang taka tar lan pawh a awm lo a ni,” tiin Soren-a hian a tar lang.
A hmain Dreze-a chuan Ranchi-a thuthar lakhawmtute a kawmnaah Jharkhand sorkar chu biakrawna state assembly thutkhawma budget session neih turah pawh VB-G RAM G Act duh lohna pass tura nawr a tum thu a sawi a, hetiang hian Punjab leh Karnataka sorkar chuan duh lohna hi a pawm tawh a ni.
Jharkhand-ah hian inhlawhfate leh mihring dikna chanvo humhalhtute pawhin dan thar hi tha an ti lo hlawm a, an state ang mi rethei tamnaah chuan khawsak phung nghawng thei a nih avangin a him lo thei tih an sawi a, ni 100 inhlawhnaa innghat chhungkua tam tak an la awm niin an sawi a ni.