Lir a nghin thulha chet lak dan tur…
January 13 leh 15 hian, lirnghing a thlen thulha chet lak zui dan tur chu Mizoram pumah a tak ang thei ber tura tih chhin a ni dawn a. Hemi chungchang hi Mizoram State Disaster Management Authority leh Mizoram district 11-a Disaster Management Authority (DMA) member-ten tunhnai khan an sawi ho a.
Leilung chanchin zir mithiamte chuan Mizoram hi lirnghing na takin a nuai theihna hmuna awm a ni, an ti a. Tun hnaia Indian Tectonic Plate, Tibet hnuaia khichat nasa tak insiam anga mithiamte sawi chuan, India ramah nghawng nasa tak a thlen thei tih chanchinthar lamah te hmuh tur a awm a. Tun hnaiah, India ramah lirnghing a awm chho leh ta zauh zauh a, Mizoram pawh theih ang anga kan lo inralrin a pawimawh hle tih a hriat mai awm e.
Tunhma atang tawhin lirnghing a thlen thulha chat lak dan tur mock drill / exercise hi Mizoramah kan lo nei tawh thin a. Mock drill neih tawhte kha ‘a hlawhtling’ duh viau zel a, a chhan pawh ruahman-sa-na hnuaia kalpui a nih thin vang a ni a, lirnghing tuartute chhanchhuahna tluang tak kan hmu thin a ni.
Mock drill neih thin avang hian kan lo ‘confi’ ve viau mai ang tih a hlauhawm. ‘A tak’ leh ‘a lem’ chu inthlau tak a ni. Mock drill-ah chuan lir a nghinin, kawngpui mam tha tak chungah lirthei a tlan zur zur a, electricity tha tak hnuaiah, signal tower tlu miah lo karah, inbiakpawh nan mobile phone duhthalin kan hmang thei a, concrete in chhawng chimin kawngpui a block avanga thir chaicheh lian leh JCB rawih ngai lovin kan tlan kual zung zung thei a. Thil dang tam tak pawh…
Hetianga mock drill neih thin hi a tha em em, chutih rualin, a tak tak lo thleng ta se, kawngpui a khi chat thei a, inkalpawhna a buai vek thei a, power a awm lo thei a, inbiakpawhna a chhe vek thei a, damdawi in ber pawh a lo chhe rup thei a, chutiang zawng zawng a taka a lo thlen hunah, ‘a substitute’ tur hi kan lo ngaihtuah reng em? Kan lo inralring em? Inbiakpawhna te, emergency-a Power hman tur te, inkalpawhna a chhiat huna chet lak dan tur te, tuilakna a chhiat palha tui in tur thianghlim… a tam mai.
Hengte hi sawrkar mawh ngawr ngawr a ni lova, sawrkar chuan mipui himna tur chuan hma chu a la teh meuh ang; chutih rualin, mipui lam pawh hian lirnghing a thlen thulha mahnia inenkawl thei tura ‘Emergency Kit’ kan lo ruahman ve thlip thlep hi a pawimawh a. Hetiang hi sawrkarin a ‘mandate’ kher ngai lova, mipui hian mahni theuh kan ‘in mandate’ a pawimawh dawn hle a ni.