Khawpuia tuichhia luanna tur project liantham kalpui dawn
Aizawl leh khawpui lian danga khawpui tuichhia mumal taka a luan theihna atan sawrkar chuan Storm Drain Projects a duang a. Hemi leh major works dang kalpui tur chu Ningani khan Urban Development & Poverty Alleviation minister K Sapdanga’n a khuhhawng.Minister chuan he project hian khawpui hmasawnna tur chauh ni lo, khuarel chhiatna thleng thei laka khawpui venhim hna a kengtel tih a sawi a. Kan khawpuia hmasawnna hna kan mamawh zinga hmanhmawh thlak ber chu tuiluankawr tha a ni tih a sawi.
“Zirbingna atanga a lan danin, Aizawl khawpui chhungah inthiarna leh choka-a tui kan hmanral hi nitin litre maktaduai 48.6 a ni a, heng tui hi tuiluankawr thleng pha loa leia thamral deuh vek an ni. Furah a let tam tak tui a luang bawk a, hei hian lei chunglang chiah hnipin, kan chenna khawpui hi kum telin a derthawng tial tial a, chhiatna rapthlak kan tawk ang tih a hlauhawm. Hei hi sawrkarin ngaipawimawhin in tin atanga tui chhuak zawng zawng leh ruahtui luanluhna atan tuiluankawr siamna tur Storm Drain Project hi duan a ni,” a ti.
He project hi chhiatna thleng thei laka khawpui venhimna hna a nih avangin contractor-te pawh chhanhimna hna anga ngaia, hmanraw tha hmang a, hunbi ngaipawimawh a, hna tha taka thawk turin a chah a. Chhiah chawi chungchangah pawh dan zawm turin a ngen.
Local Council hotuten an veng theuha hnathawh uluk taka vil turin UD&PA minister hian a chah a. Project lian bakah composite work hrang hrang – step siam, retaining wall siam, vengchhung kawng leh tuiluankawr tenau siam pawh kalpui zel a ni tih a sawi a ni.
“Heng composite work hi a vengmite emaw a bulhnaia in neituten an thawh ve ngai a nih thin avangin awmze nei zawka kalpui a nih theihnan inkaihhruaina duan a ni a. Mipui tam thei ang ber huap project tha leh kan khawpuia chen tinuam tur hmasawnna ruhrel hrang hrang duan zel hi sawrkar leh UD&PA department duhdan a ni,” K Sapdanga hian a ti.
Project khuhhawn chu:
8 SASCI hnuaia Aizawl hmun 26-a tuiluankawr km. 8.135 siamna tur
8 District headquarters 10-a tuiluankawr km. 11.514 siamna tur
8 Khawpui hmasawnna tur project – multi utility building, community hall, auditorium, approach road
8 Bana Kaih Policy 2025–2026 hnuaia Aizawla composite urban development hna – drain, step, retaining wall, culvert, approach road, footpath siam leh a dang, a vaiin hna 237 awmin, hnathawhna atan cheng nuai 1122 dah a ni.