Social media banned…

Nikum December ni 10 khan Australia sawrkar chuan naupang kum 16 chin hnuai lam tan social media hman khapna dan a siam a. A chhan leh a vang chu sawifiah ngai lova kan hriatchian sa vek tur a ni awm e.
Madras High Court chuan Australia hmalakna chu tha a tiin entawn atan a duh a. Australia-in social media khapna dan a kalpui hnu thla khat pawh a la liam hmain sawrkar laipui hnenah Australia kalphung entawna social media khapna dan siam ve tha a tih thu thlenin rawtna (suggestion) a thlen ve nghal a. Madras High Court suggestion hi nu leh pa tam tak leh child rights group hrang hrangte chuan an thlawp thu an auchhuahpui ve nghal bawk a ni.
Australia hi khawvel huap pawha hetiang dan siam hmasa ber a ni a, khawvel ram dangte pawhin Australia lam hi an hawi nghal deuh thup a, he dan hi a hlawhtlin that viau chuan Australia hnung zui duh tur hi an tamin a rinawm.
Zirchiannain a tarlan danin, Australia ramah hian naupang kum 10-15 inkarin social media an hmang a, chung zinga 10 zela 7 chuan content tha lo chi hmeichhe chunga hleilenna lam hawi leh thil dang danga tharum thawhna lam chi leh hursualna lamhawi an en thin tih hriat a ni. Hei vang hian social media platform hrang hrang heng – Facebook, Instagram, Snapchat, Threads, TikTok, X, YouTube, Reddit, Kick leh Twitch te chu khap a ni a. Heng zinga a tam zawk hi chu Mizote pawhin kan hmelhriat mek a nih hi.
Australia-in khapna a kalpui dan turah hian, naupang nu leh pate lama tuan lovin, social media company-te chu, social media hmangtute hriatchian theihna “age assurance technologies” hmang turin a phut thung a ni. Sawrkar dan zawm duh lo company-te chawi tur pawh a sang veh vawh hle a, Australia dollar maktaduai 25-49 thleng chawi theihna a awm a ni.
Tuna hriat theih chinah, Australia hnungzui tur awm anga hma la mek ramte chu — Denmark, Norway, France, Spain leh UK te an ni.
Social media do nan hian Rajasthan leh Uttar Pradesh chuan sawrkar school-ah ni tin minute 10 chhung zirlaiten newspaper an chhiar tur a ni tih dan (mandatory) an kalpui tawh a, hei hi zirlaiten reading habit an neih nana ruahman a ni a, chanchinbu lak man hi school education council-in a tum dawn a ni awm e.
Mizoram sawrkar hian hetiang lamah hian ngaihtuahna a seng tawh em le? Tuna budget session lo awm turah hian hetiang lam hawi Bill hi hmuhtur awm tak maw?