J&K-a ft 12,000-a sangah JeM firfiak tawmna hai chhuak

J&K-a ft 12,000-a sangah JeM firfiak tawmna hai chhuak
Venhim hna thawktuten Jammu & Kashmir-a Kishtwar-ah hlawhtlinna lian tak changin feet 12,000-a sang, Chhatroo-a Singhpora-ah Jaish-e-Mohammad firfiakte tawmna hmun an hai chhuak.
Thawhtannia an hai chhuah hmun hi fing taka ker niin chhuah leh luhna pawh eng emaw zat a awm a, mi pali chuang awm theihna niin ei tur, cooking gas, desi ghee, buh leh ei tur dang leh puankawp pawh awm vek a ni.
Mi firfiak tawmna hmun hai chhuah tuma beihna hi Operation Trashi-I an thlak mek kal zelah niin heng lai velah hian JeM mi pakhat an lo that tawh bawk.
Beihpui hi mi firfiak an awm nia thu an dawn bawhzuia Pathianni atanga an thlak kha a ni a, a hmain Jammu-ah mi firfiakte nen an lo inkap zauh zauh tawh bawk.
Firfiakte nena inbeihnaah hian sipai pakhat, Havildar Gajendra Singh-a thiin sipai dang pasarihin hliam an lo tuar tawh bawk.
Venhim hna thawktuten firfiakte tawmna hmun an hai chhuah hi heng lai hmun huala tuma luh leh chhuah theih lohva an dan zel laiin a ni a. Beihpui thlaktu zingah hian sipai, police leh paramilitary force an tel a, drone uisathiamte chhawrin ram chhengchhia leh khawkrawk takah an che a ni.
India hi Republic Day lawm tura inbuatsaih mek niin thuneitute pawhin an mit leh beng an chhi uluk hle a, firfiakten tihbuai tuma hma an lakna awm thei dan vek an tum a ni.
Thawhtannia beihpui thlak hma hian kar hmasa khan Jammu & Kashmir-a Kathua district-ah firfiakte lakah beihpui an lo thlak tawh a. Zirtawpni khan JeM tawmna hmun pathum an hai chhuak a ni.
Hemi tuma an chetnaah hian mi firfiakten an lo kap a, zan thleng an inbei zui nghe nghe.
Police chuan an tawmna hmun an hai chhuah hmasakah hian M4 cartridge pahnih, a chhunga desi ghee awm plastic box, almond, kutkawr, lukhum, puankawp, tarpaulin sheet, pouch te chi awmna polythene ip an hai chhuak.
Hmun hnih dang an hai chhuahah hian cooking gas cylinder, ei siamna tel, charger hrui, kutkawr, ei siamna leh bungbel, tel bur ruak, plastic bag lian tak tak, sihdet, puankawp, bur, ei tur funna leh thil dang tam tak an hai chhuak bawk tih police-in an sawi.