Tourist lo dawnsawn dan…

Nimin khan tourism minister hovin tourism hotute leh council of churches in Mizoram aiawhte chuan, tun hnaiah khualzin an rawn pun chak tak em avangin engtia lo dawnsawn tur nge tih chungchang an sawi ho a.
Tourism minister-in a sawi danin, nikum September atanga Sairang thlenga railway service hawn thar avang khan October thlaah chuan khualzin lo lut hi singkua an tling hman tawh a. December thla chhungin khualzin nuaikhat an lo lut bawk.
Heta tanga lo lang ta chu, September ni 13 atanga October thla pum kha ni 45 anga chhutin, hemi chhung hian khualzin singkua an tlin chuan chawhrualin ni tin khualzin 2000 vel lo thleng ziah ang a ni a. December thla chhungin nuaikhat an tling a, chu chu chawhrualin ni tin khualzin 3300 vel lo lut ziah ang a ni bawk. Tunah January thla kan hmang mek a, khualzin hi pung zel tura ngaih a nih avangin, ni tina khualzin lo lut hi 4000 an chuang thuaiin a rinawm.
Kristiante hun pui ber Krismas kan hman lai khan khualzin tam tak chuan kohhran hrang hranga ruaitheh kha an chhim a, a then chuan chaw leh sate pawh an sem kual ve lawp lawp a, nuam an tih hmel khawp mai. Chaw dawh tur intlar zingah khualzin an inzep hlawm bawk a, nuam an tiin an tlangnel hle a nih kha.
Khualzin zingah social media lama video thehdarh thin (video blogger/vlogger) tam tak an awm a, a hmingtha zawngin tun dinhmunah chuan min la chhuah tlangpui rih niin a hriat a, hei hi a lawmawm hle. Chutih rualin, a êng lam chauh ni lo, a thim lam (dark side) pawh hi an la tuipui zel lovang tih sawi theih a ni lo.
Chuvangin, tourism lama hmasawnna kan zawng dawn a nih chuan, kan ram mawina leh sik leh sa boruak nawmna ringawt hi a pawimawh ber a ni lo a, a mi chenga te khawsak phung leh ziarang, khualchhawn dan hi a pawimawh lai bera chu a ni. Tun dinhmunah chuan, ram ralmuang, zan reiah pawh hlauh tur awm lo, mikhual lawm thiam, mi tanpui peih etc. tih chu vlogger ten an chham chhuah tam ber pakhat a ni rih a. Hei hi kan vawn nun chhoh zel a, tun aia mawihnai leh awmze nei zawka mikhualte kan lo dawnsawn thiam chuan, ‘tourism industry hi state sum hnar tha tak a tling thei’ tia tunhmaa lo sawi thin kha a thlen dikna tur a ni ang.
Kan biak inah te pawh an inkhawm duh a nih chuan, kan Pathian biak dan kalhmang hrilh hre chunga kan lo dawnsawn thiam a pawimawh ang a. Biakbuk chhungah kan biak Pathian kan dah pawimawh ber tih an hriat thiam theih nan, a bika lo lawmna ‘dintir’ ang chi emaw chu kan tihtur a nih a rinawm loh.
Eng pawh ni se, khualzin zingah mi dik lo an inphumru ve thei tih hre chunga fimkhur taka kan lo dawnsawn a pawimawh a, chutih rualin a ram leilung fate zingah, mikhual chunga hlei lo len duh mai an awm thei bawk tih kan hriat reng a pawimawh. Chuvangin, hetiang hun atana pawimawh, kan Mizoram Tourist Police-te pawh kha, an uniform nen khawlaiah han vei ve thuak thuak thin se, khualzinmite tan pawh a thlamuanthlak ve ang chu maw le!