Biak in leh hmun danga tourist lo dawnsawn dan tur chinah CCM rawn
Biak in leh hmun danga tourist lo
dawnsawn dan tur chinah CCM rawn
Tourism minister Lalnghinglova Hmar hoin Tourism department hotute leh Council of Churches in Mizoram (CCM) aiawhte chuan tunhnaia Mizoram tourism chungchang sawihoin Thawhlehni khan an thukhawm.
Tourism minister chuan tunhnaiah Mizoram-in khualzin a neih zat a pung nasa a, an la pun belh zel an beisei bawk a, chumi tur chuan an department-in hma an la tih a sawi. Chutihrualin khualzin rawn pun belh hian nghawng a nei lo thei loa, an rawn pun tak zelah chuan engtin nge kan lo dawnsawn ang, tih ngaihtuah a ngai, tiin, kohhran hrang hrang hruaitute nena thutkhawm a ngaih chhan a sawi.
“Tourist-te hi kan nunphung leh khawsak dan hre sa bik loa lo lut an ni a. Tourism chuan mi zawng zawng a nghawng avangin kohhran leh khawtlang hruaitute, tlawmngai pawl nen thawhhona tha tak neia lo dawnsawn a ngai,” a ti a. 2025 December chhungin district pathum belh tel loin khualzin mi nuai 1.1 chuang Mizoram-in a nei tih a sawi a ni.
Hunpui kan hman laia lo kal chakte an ni a, nakin zelah hetih hunlai hi khualzin tam lai tur a ni tih Lalnghinglova Hmar hian sawiin, hei vang hian mipuiah kan lo dawnsawn leh an laka kan rilru puthmang tur kan lo inhrilh a, kan lo insiamrem a ngai tih a sawi.
“Biak in hi khualzinte tlawh chak zingah a tel a, biak in chhunga awm dan tur leh inthuam dan tur thlenga mikhual lamin an hriat theihnan hma lak dan leh, eng chinah nge an lo tel ang tih sawiho a pawimawh hle a; CCM nena hmalakho dan tur ngaihtuah a tul a ni,” a ti.
Council of Churches in Mizoram hruaitute chuan, Mizorama khualzin pung chu lawmawm an tih thu leh Mizoram tlawhtu an pung chuan kohhran pawh a nghawng tel thu an sawi a. Chuvangin kohhran anga ngaihtuahna sen a, hma lak tul an tih thu an sawi a ni.
Thutkhawm hi a bultanna leh sawihawnna atana hman a ni a. Hun remchang hmasaah thawhho dan ngaihtuah leh hmalakna awm thei hrang hrangte thlirhoa thutkhawm leh nise tiin an rel. CCM lam pawhin hma lak an duhdan ngaihtuahin lo thukhawm ve se tih a ni bawk.