Israel-in Palestinian puitu, Unrwa hmunpui nawr chhia

Israeli demolition team-te chuan police nen an luah lai East Jerusalem-a UN hnuaia Palestinian refugee agency, Unrwa hmunpui chu an nawr chhe tan.
Israel chuan a dinna hmun hi an ram a ni a, West Bank leh Gaza-a Palestianian-te puitu, zirna leh damdawia chhawmdawltu pawl, Unrwa hi Hamas-in tawm nan an hmang thin niin an sawi.
Agency erawh chuan puhna hi phain an huam chhung chu ram hrang hrangte venna hnuaia awm a ni tih an sawi.
Israel-in hetianga hma an lak hi nikuma dan sawi hlawh tak, Israel leh East Jerusalem-a Unrwa awm phal lohna dan an pawm hnu lawkah a ni.
Thawhlehni tuk khan demolition crew-te chuan kum 10 chuang lo awm tawh hmun hi hmanhmawh takin an nawr chhia a ni.
Khawl lian hmangin a chung rangva leh a bangte chu nawr chim a ni a, a inchhek vum nasa hle.
Israel chuan hna an thawh tan lai hian UN mi leh sa tumah an awm lo niin an sawi.
Unrwa hian a hma atangin Israeli thuneitute atangin nawrna an dawng nasa hle a. January, 2025-a dan pawm a nih hnuah Israel nen hian a biak pawh an inbepawh tawh meuh lo.
East Jerusalem-a damdawi in chu khar luihtir an ni a, electricity company-te pawhin Unrwa hmuna power pek an sut tan hlawm bawk a. Hetianga hmalakna hian mi a barakhaih lem lo thung.
Unrwa hotupa, Philippe Lazzarini-a chuan ‘khawvel dan bawhchhiatna leh palzutna dik tak’ tiin social media-ah a tar lang.
UN hmunhmate hi khawvel ramte inremna hnuaia venhim niin ‘mi zawn, enthlak leh thil dang hmanga tihbuai’ phal mai mai an ni lo.
Hetih lai hian Israel chuan heng dan zam hi palzut nia sawiin Unrwa thawktute hi October 7, 2023-a Hamas-in an ram beihnaah pawh khan an inrawlh niin an sawi.
Israeli foreign ministry chuan hmunhma nawr chhiat hi tih ngei ngai a nih thu leh Unrwa chu ‘firfiakna siam chhuahna’ tiin an sawi.
UN pawhin October 7 beihnaah khan Unrwa thawktu pakua an inrawlh thu a pawm a; mahse, agency hian Hamas a luh ruktir thin tih erawh finfiahna a awm lo.
East Jerusalem-a an hmunpui leh hmun danga an hmunhmaten beih tawk mah se Unrwa hian West Bank leh Gaza-ah chuan hna an thawk zui zel.
Kum 1949-a din niin mi sang tel thawktu an awm a, Palestinian raltlante tan an thawk thin a ni.