YMA hminga mi sum chhuh luitu YMA-in hnawtchhuak

YMA hminga mi sum chhuh luitu YMA-in hnawtchhuak
ITI Veng Aizawla cheng tlangval pathum chu an veng mi pakhat hnenah YMA hmingin vau betin sum an dil a, YMA-in manin police kuta an hlan bakah an veng atangin an hnawtchhuak nghal.
YMA ITI Veng Branch hruaitute sawi danin, kumin January 19 zan dar 10.00 vel khan an venga cheng mi pathum chuan ITI Veng YMA Vanapa Section-a cheng Lalthlamuana chu YMA hmingin pawisa an dil a, a pek ngeina turin an vau zui a, pe lo thei lo dinhmunah an siam a ni.
He thil hi an hriat veleh heng mite hi zawng nghalin, January 20 zan khan an pathum hian thu zawhfiah an ni a, an ti ngei tih YMA hruaitute hmaah an puang a ni.
YMA thuchhuah danin an zinga pahnih hi Myanmar atanga raltlana ITI Venga chhungkuaa inbengbel an ni a, a dang pakhat hi Lawngtlai district lam mi a ni. An vai hian tuna pawi an khawihna nia sawi ITI Veng Vanapa Section-a cheng an ni a, an zinga pakhat hi kum tling lo niin midang hi kum 18 mi leh 21 mi an ni.
January 21 zan khan an pathum hian YMA-in ko lehin, ITI Veng huamchhunga raltlan zawng zawng koh tel an ni a. Branch Executive Committee chuan raltlan chungchanga kum hnih kalta atanga thu dah an lo neih tawh sa ang leh, hetiang thil duhawmlo hi a thlen nawn tawh lohnan, heng mi pathum hi ITI Veng chhunga an awm an remti tawh lo a; anmahni tan pawh a a that zawk beiseiin, hemi zan la la atang hian ITI Veng leilung rap tawh lo tura hriattir an ni.