Mizo thar buhhum…

Mizoram Agricultural Marketing Board chuan nimin khan press conference kaltlangin kumina sawrkarin kuthnathawktute thlai tharchhuah a lei dan tur an puangzar a. Thlai lei turte hi— sawhthing, aieng hring, hmarcha te ro, hmunphiah ro leh Mizo buhhum te a ni a. February ni 2 atangin a lei tan dawn a, sawhthing hi thla li chhung a lei ang a, aieng leh hmarcha hi thla thum chhung, hmunphiah chu thla hnih. Mizo buhhum hi chu kumhlui November atanga lei tan tawh kha a ni a, kumin January thla chhung a awh dawn a ni.
Sawrkarin support price hmanga thlai a lei ve ta hi Mizoram inrelbawlnaah bung thar tia sawi tham chu a ni phawt mai a, chutih rualin kuthnathawktuten an hnemhnanpui dan tur erawh, hunin la rawn hril chhuak zel turah dah ila. Tunah pawh hian, sawhthing chingtu tam tak chuan an hlawkpui thu an sawi a, thenkhat erawhin, support price hian sawhthing rate a tihniam a, kan hlawkpui tur angin kan hlawkpui lo, ti te pawh an awm. Eng pawh ni se, ‘kan hralh thei dawn nge hralh thei dawn lo’ tih hriatchian loh dinhmuna ding kuthnathawktu tam tak an awm ve bawk thin a, chung mite tan chuan support price a lo awm ta hi a thlamuanthlak ang tih a rinawm.
Tun tumah hian, Mizo buhhum lei dan turah bung thar a lo chhuak a, a hmaa pilot project atana Mamit leh Kolasib district chauh kalpui kha, tunah chuan Mizoram pum a huam ta a. Chutih laiin, buhhum hi chu sawhthing anga collection centre awm ve lovin, Kolasib district chhunga rice mill awmna Pangbalkawn a ni tawp mai. Chhim tawp atanga hmar tawpa buhhum Kg 1 Rs 30-a hralh tur chuan, tha leh zung, hun leh transportation cost nen, awmzia a awm dawn lo a ni. Rice Mill bul hnaia buhhum hralh tur neite tan chuan, awmzia a nei ve deuh mahna.
Tuna sawrkarin buhhum a lei tawh zat hi quintal 1688.39 a ni a. Hei hi FCI-in buhhum leh buhfai conversion rate a hman dan (100:67) anga chhut chuan, buhfai quintal 1,131.2 hu a lo ni ta a. Sawrkar chuan buhhum lei nan hian Rs 50,65,170 (@Rs 30) a hmang tihna a ni a. Buhfaia a lo chan hian buhfai Kg 1 man chu Rs 44.77 a lo ni dawn ta a ni.
Rice Mill-a buhhum herna man, supply department kuta hlanna transportation cost nen, sawrkarin Mizo buhhum Kg khat lei nana a senso zawng zawng hi Rs 46 vel lo ni ta se, Mizo buhfai hi tuna ration Card var rate (Rs 30) anga tihral a nih chuan, sawrkarin Mizo buhfai Kg 1 a leina (actual rate ) chu Rs 16 vel tihna a ni dawn ta a ni.
Hetiang chhiarkawp atanga chhut chuan, Mizo buh thartuten an hlawkpui tham ve deuh tura a rate hi la tihsan theih niin a lang. Eng pawh ni se, Rice Mill hi district tinah awm thei se, buh thartuten an hlawkpui ang a, chu chu kuthnathawktute hlawkpui tur ngaihtuahtu sawrkar tan pawh a hlawkthlak dawn tihna a ni.