Hmasawnna hna thawh dawnin harsatna siam thin an awm

Hmasawnna hna thawh dawnin
harsatna siam thin an awm
Department-in hmasawnna hna a thawhna dawnin veng thenkhatah rem an lo ti lo thin a, forest leh environmental clearance-ah harsatna awm thin bawk tih minister Prof. Lalnilawma chuan a sawi.
AMRUT 2.0 hnuaia thawh tur, mahni in leh kawtkaia kartluana chatlak loa tui herhhaw theihna tur ‘24X7 Pilot Project’, Vaivakawn leh Chawnpui Veng hmun thenkhata kalpui tur chu Ningani zan khan Public Health Engineering minister hian a hawng.
Minister sawi danin, he project hi UD&PA kaltlanga Ministry of Housing & Urban Affairs atanga hmuh a ni a. Cheng vaibelchhe 5.24 senga thawh tur niin, pilot project a nih angin chhungkua /in 300 a huam dawn a, smart meter vuah vek tur niin, project atan hian pipeline network thar hman a ni dawn a ni. Tuna a huam phak loh tan pawh ruahmanna siam lawk nghal a ni dawn tih a sawi bawk.
Hmasawnna hna thawh kawngah department-ten harsatna hrang hrang an tawh thin thu sawiin, “Hna thawhnan in hmun leh ram khawih chet a ngaih chang a awm a, veng thenkhatah chuan veng neituten an rem ti lo thin a, forest leh environmental clearance-ah harsatna a awm thin bawk a, hna thawh a harsat chang a tam a ni,” a ti.
Chutiang a nih lai chuan 24×7 pilot project kalpui turah veng mipuiin inpeknaah an lawm tih Prof Lalnilawma hian a sawi a ni.
Tui pipe chu a that theih hun chhung kum 15 vel a nih thin laiin, khawpuia tui pipe tam tak chu kum 30 chuangte an ni tawh hlawm a, tui leak awm thei reng a nih avangin sawrkarin tui leak report-na tur mobile app a siam chu zirchiang a, hmang tangkai turin mipui a chah tih a sawi bawk.
24X7 tui herhhaw pilot project:
8 Hna hi thla 4 atanga thla 6 chhunga zawhfel tum a ni.
8 24×7 system-ah hian IoT (Internet of Things) leh Scada Unit hmankawp tum a ni a. Tuizemah tui level monitor-na tur ultrasonic level indicator, automated valve leh flow meter install a ni anga, consumer 300 hnenah smart water meter a thlawnin vuahsak an ni ang. Connection pipe leh distribution network thar engemawzat siam a ni dawn a ni.
8 Mobile phone-a message leh thlalak inthawn dan ang deuhin he system hian hna a thawk dawn a, consumer water meter reading, tui a dawn zat, valve hawn leh khar, tuizema tui level leh tuizem atanga tui chhuak zat gate-way leh cloud storage hmangin communication, monitoring leh operation siam tum a ni.
8 Mobile apps leh cloud storage hmangin a enkawltu engineer-ten Control Room emaw an smart phone atangin emaw tuizema tui level, tuizem atanga tui chhuak zat, valve hawn leh khar, consumer-in tui an hman dan, an meter reading a hmu vek thei dawn a, signal-in a man that theih lohna hmuna smart meter chu hand held device kengin a bulhnaiah emaw signal a man phaknaa kalin meter reading a lak theih a ni.
8 He apps atang hian consumer-ten an tui hman tawh dan, tui an hman tam lutuk chuan warning an hmuin an en thei dawn a ni.