IAF tana ram lei danah thudik hailan tum dawn – K Vanlalvena

IAF tana ram lei danah
thudik hailan tum dawn
– K Vanlalvena
Indian Airforce tana Sihphir leh Lengpuia ram lei danah thudik hailang turin theihtawp a chhuah dawn tih Rajya Sabha MP K Vanlalvena chuan a sawi.
Zirtawpnia Mizo Hnam Run inkhawmah MNF adviser ni bawk K Vanlalvena chuan, Sihphir leh Lengpui airport chhehvel ram hmanhmawh taka lei a nih danah India Defence ministry-in mimal kut atangin ram a lei loa, Mizoram sawrkar kut atangin IAF-in ram a lei a ni zawk, tiin a sawi.
India ram bung khata awm kan nih avangin sawrkar laipui hmalakna hrang hrang – railways, kawngpui sial leh a dangah pawh hma lak dawnin, state sawrkarin no objection certificate a pek a ngai thin a. Hei hi thil kalphung a ni tih a sawi a ni.
ZPM MLA pakhatin Sihphir leh Lengpui chhehvel ram lei chungchang sawrkarin a hriatpui loa, DC level-a tihfel a nih thu a sawi chu thudiklo a ni Rajya Sabha MP hian sawiin, “2025 May 15-ah sawrkarin Lengpui leh Sihphir ami hi a rukin Award for Acquisition a chhuah vek a, chuvangin ZPM sawrkar hian midang a puh thiang lo. Lok Sabha MP nilai hi Parliament Standing Committee on Defence-ah member a nih avangin a hriat ve ngei tur niin a lang a. A hrelo a nih chuan a lungawi loh hle a rinawm,” a ti.
Sawrkar hmalakna chu minister handwriting hmanga ziak a ni ngai loa, sawrkar officer-te hminga ziak a ni thin tih a sawi a. Act 213 hmangin sawrkarin ram a lei thin a, dan anga chanchinbua chhuah tur a nih laiin, ram neitu diktakten an hre ve miah lo chu mak a tih thu a sawi.
“Thil diklo inphum a awm ngei tih leh, dan bawhchhiatna a awm tih a chiang a. Thudik hailang turin theihtawp ka chhuah dawn a, a hre turten an hriat ngei theihnan ka aupui dawn. Sawrkar chetchhiatnaah hian kan lawm a niloa, kan kawng Pathianin min ruatsak zel avangin kan lawm a ni,” a ti.