BRTF kawng siam: ‘a chhia’

Lungdai khawtlang atanga sawiselna an dawn avangin Central YMA Road Monitoring Committee Member te chuan, BRTF kawng siam mek, Durtlang leh Zanlawn inkar chu nimin khan a hmunah an enfiah a; a tha lo ngei tih finfiah a ni a. Hmun thenkhata an kawng hnawhte chu kut pawhin a khawh hlawk hlawk theih a. Kawng siam hi a chhiat em avangin nimin zingkar la la pawh khan lungthilah two-wheeler pali an tlu hman a ni awm e.
Cental YMA Road Monitoring Team hian BRTF leh Contractor-te hi ruahmanna an siampui nghal a, hetiangin: Duhthusama thain hna an thawk chhunzawm tawh ang; Lungdai area-a an hnathawh tawh zawng zawng an nawr khawk leh vek ang a, an siam tha leh ang; kawng siam chhunzawmna tûr Bitumen Concrete (BC) truck trip 3 chu a daih tawh avangin a hman tlak tawh loh a, an paih vek ang; an kawng siam tawh sa hi Seal-coating an ti leh vek ang, tih te a ni.
Mizoram hi international border hual vela awm kan nih avangin kawngpui siam tur hian, Ministry of Defence hnuaia statutory body pakhat Border Roads Organisation hnuaia kawngpui siamtu Border Roads Task Force (BRTF) chu tunhma atanga Mizorama lo awm tawh an ni a. Border chheh velah hian ram venhimna hna pawimawh tak tak thawh a ngaih thin avangin, ralthuam rit tak tak phur lirthei leh bungrua hrang hrang phurtu lirtheite awlsam taka an tlan vel zung zung theihna tur kawngpui tha tak siam a tul thin a ni. Tunhmaa kawngpui siamte kha chu, kawngpuia alkatra luan kha a tak tha a, nipui laiin a lo nem a, a rah pherh theih thin a ni.
Tun hnuah hi chuan kawngpuia alkatra (bitumen) luante pawh rah pherh tur a awm thei tawh lova, siam a nih mek lai la la pawhin a phut hman a, kutlawnga kheuh phawh theih a ni a, lungthil a a insiam a, two-wheeler tan vanduai mangkhawng a ni nghal vat thin. Hei hi khawpui chhung hmun thenkhata kawngpui siamte pawh a dinhmun a ni. Tun hnuah hian siam that tir an nih avangin Aizawl khawpui chhung kawngpui pawh a ziaawm ve ta deuh chauh a nih hi.
Pawimawh ta chu, Lungdai khawtlang anga mahni khaw chhehvel development work reng reng, uluk taka lo enpui a, dikhlel a awm nia hriat chuan thuneitute hnena thlen vat, hi a ni; kawngpui chauh lo pawh, hmasawnna hnathawh apiang. Hetiang hian khaw tin hian kan kalpui theih phawt chuan, hmasawnna hnathawhte hi a chhe lutuk thei dawn lo a ni.