Villa in last 16 an lut

Ningani zan khan Europa League khelh chhunzawm a ni a, Mimuala hnehna chang Aston Villa in last 16 an lut. Villa in last 16 an luh lai hian Robinhood-a te khua Nottingham Forrest erawh chuan tlak an hnaih ve thung.
EPL-ah pathumna ni mek Aston Villa hi Turkish club lian Fenerbahce hmachhawn turin Ulker Stadyumu-ah an leng lut. Mikhual an nihna hmunah bul an tan tha a, inkhel tan atanga minute 25-naah Manchester United atanga an hawh mek Jadon Sancho chuan hmahruaina goal a thun. Mikhual an nihna hmunah goal thun hmasa zawk an nih vangin inrintawkna sang zawk nen an inlan zui theih phah. Last 16 luh beisei zui thei tura chak mamawh Fenerbahce in an si phurh sut tumin tan khawh nasa viau mah se an hun tha neih an chhawr tangkai thei lo. Uiawm taka an hun tha neih an hlah fo vangin an mualah ngei uiawm takin an tlawm a, point an hlawhchhuak zo lo.
Fenerbahce laka point thum hlu tak an hmuh hmangin Aston Villa hian khelh 7 atangin point 18 an hmu a, last 16 an lut chiang nghal. League round-ah khelh hmabak khelh khat la nei bawk mah se pa 8-na aia hniamah an awm thei tawh lo. An mikhual ten last 16 an luh chian laiin Fenerbahce erawh chu khelh 7 atanga point 11 hmuin 18-naah an awm ve mek thung. An khelh hnuhnung berah play-off khelh phak ngei tumin thih tha tak meuh meuhin tan an khawh zui leh ang.
Aston Villa in mikhual an nihna hmunah hnehna an chan laiin Nottingham Forrest erawh chu mikhual an nihna hmunah an tlawm ve thung. Forrest hian direct in last 16 an luh phak a rinawm tawh lova, last 16 playoff khel phak hram turin tan an khawh zui hle a ngai tawh ang.
Robinhood-a te khua Nottingham Forrest hi Portuguese club Braga hmachhawn turin Estádio Municipal de Braga ah an leng lut. Mikhual an nihna hmunah chak tum viau mah se an vanduai a, point an hlawhchhuak zo lo. Forrest leh Braga te hi an inhnehtawk viau a, goal pawh a lut lawk thei lo. He inkhela goal awmchhun hi minute 54-naah Nottingham Forrest player Ryan Yates-a’n an lama a tih goal a ni a. An lama an tih goal hi sut tum viau mah se minute 90+4-ah Elliot Anderson hnawhchhuah a ni a, Forrest tan chet a harsa leh zual. Hun tawp thlengin goal lut a awm belh thei tawh lova, own goal vangin Braga in hnehna hlu tak an chang zui ta a ni.
Nottingham Forrest hnehtu Braga hian khelh 7 atangin point 16 an hmu a, last 16 lut chiang tluk an ni der tawh. Hetihlai hian NottinghamForrest chuan point 11 hmuin 16-na an luah ve mek thung.