Press – the Fourth Estate

Thuthar thehdarhtu news media-te hi Press tia koh an ni a, tunhma chuan Fourth Estate tih an ni thin. A lo chhuahna pawh, a tawi zawngin, tunhma (French Revolution) hun lai vel khan ram inrelbawlna hna thawktu pawl pathum First Estate (the clergy), Second Estate (the nobility) leh Third Estate (Commoners) an awm a. Thuthar thehdarhtute kha Fourth Estate tia koh an ni.
Hun a lo kal zel a, hemi behchhan hian democracy inrelbawlna hnuaia ram roreltu Ban (Pillar) pathum – legislature, executive leh judiciary te chu “The Three Pillars” tih a ni ta a, Fourth Estate tih thin pawh chu ‘Fourth Pillar’ emaw ‘Press’ emaw tia koh a lo ni ta a ni.
Press hi sawrkar peng a ni lo va, mahse a hnathawh hi a pawimawh em avangin sawrkar ban pathum zawmtu anga ngaiin, ‘the Fourth Estate’ tih te, ‘the Fourth Pillar’ ti tea koh a ni.
Press hi sawrkar leh mipui kara palai hna thawktu ti te pawhin a sawi theih bawk awm e. Sawrkar thu leh hla mipui tana hriattur pawimawh puanzar te, ram leh hnam hmasawnna thil mipui hnena puanzar te, sawrkar thil tih dik loh mipui hrilh hriat a, sawrkar kal dik lo tur khalh ngil etc. thlengin an thawk a. Sawrkar hian a dah pawimawh em avangin ‘accreditation’ (recognition) pawh a pe a, national day pawimawh heng – Republic day, Independence day etc-ah pawh tha taka an mawhphurhna (media roll) an hlenchhuah theih nan, a bika thutna (Press Enclosure/Gallery) pawh a siamsak ngei ngei thin. Hmun thenkhatah chuan press briefing room te pawh siamsakin interaction neih theihna tur lobby facilities hial te pawh a chhawp chhuak thin. Parliament leh Assembly House-ah te pawh Press Gallery dah chu ‘compulsory’ a ni bawk.
Sawrkar hnathawkte hi, a thawktu mihringa te pianphung leh mizia azira en an ni ngai lova, an hna chelh pawimawh dan azira nihna pek (designate) an ni thin. Officer kuhva heh deuh, zial heh deuh, zu pawh in ve thin kha, ‘nang chu i ho em mai, room hran nei tlak pawh i ni lo’ tiin namnul ni ta se, kha officer khan a hnathawh tur a thawk tha thei hauh lovang; a tuartu tur chu amah ni lovin, a hna leh a chhawrtu mipuite kha an ni zawk dawn a ni.
Thuthar thehdarhtute hian a pawng atakin thutna tha an beisei ngawt ngai lova, thuthar zawngtu an nih avangin kal kual reng an ni a, khawi hmunah pawh an thuin an awm thei. Ruahsur karah te, leimin karah te, thlipui leh kangmei karah, a chhun a zana phe lawp lawp thin an ni. Chutih laiin, sawrkar programme pawimawh bikah chuan, sawrkar mi pawimawhte kamchhuak fiah taka an hriat theihna tur (priority access) ngaihtuahsak an phu pawh ni mai lovin, a tulin a tul zawk a, chu chu sawrkarin a ‘accredited’ te hnenah chuan a pe ve bawk ang chu maw le.