Billboard 200-ah A$AP Rocky “Don’t Be Dumb” a No.1

On Jan 27, 2026 3 0

Billboard 200-ah A$AP Rocky “Don’t Be Dumb” a No.1
A$AP Rocky album thar “Don’t Be Dumb” chu Billboard 200 (US albums) chart No.1-aha debut a, he chart-a a album No.1 kai thei pathumna a ni. Hetihrual hian ENHYPEN, YoungBoy Never Broke Again leh Madison Beer te pawh top 10-ah an debut a, Bad Bunny pawh top three-ah a rawn lang thar ve leh ta bawk.
Billboard 200 hi kar khat chhunga US-a album lar dan tehna niin, chart ranking hi kar khat chhunga US-a album hralh tam dan atanga tehin siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla a mala hralhna atanga album tlukpui te belhkhawm thin a ni.
A$AP Rocy “Don’t Be Dumb” hi kar khat chhunga 1,23,000 hralhin No.1-ah a debut a, chung zinga 76,000 chu streaming (on-demand official stream maktaduai 78.02) niin, album tak tak hralh chu 47,000 a ni a, hla mal hralhna chu chhiar tham a ni lo.
Kpop group ENHYPEN album thar ‘THE SIN : VANISH’ No.2-ah a debut a, he chart top 10-a lang thei album paruk an neihna a ni a. ENHYPEN hian 2022 khan an album ‘MANIFESTO: DAY 1” chu tNo.6 an kaipui a, he chart top 10-a an lan vawi khatna a ni, an album dang panga te chu top 5-ah an debut thei vek.
ENHYPEN “THE SIN : VANISH” hi kar khat chhungin 1,22,000 hralhin, chung zingah 1,13,000 chu album tak tak hralhna niin, streaming atangin 9,000 (on-demand official stream maktaduai 9.51) niin, album-a hla mal hralhna chu chhiar tham a ni lo.
Chart No.1 pawh lo ni tawh Bad Bunny “DeBÍ TiRAR MáS FOToS” chu a vinyl an tlangzarh thar leh a, hei hian a hralh pawh tipung lehin No.12 atangin No.3-ah a rawn invawrh thar leh ta. He album hi 1,19,000 hralh lehin chung zinga 85,000 chu album tak tak hralhna a ni nghe nghe. Bad Bunny hi February ni 8-a Super Bowl halftime show headline-tu tur a ni bawk a, tunlai chu boruak a rawn nei lian leh ta riau.
Chart No.1 hlui Morgan Wallen “I’m the Problem” chu 75,000 hralh lehin No.2 atangin No.4-ah a tawlh a, Zach Bryan “With Heaven On Top” chu 70,000 hralh lehin No.1 atangin No.5-ah a tawlh ve thung.
YoungBoy Never Broke Again ‘Slime Cry’ chu No.6-ah a debut a, he chart top 10-a lang thei album 17 a nei tling ta. ‘Slime Cry’ hi 70,000 tling deuh hralhin No.6-ah a debut a, chung zingah 69,000 chu streaming (on-demand official stream maktaduai 72.6) a ni. YoungBoy Never Broke Again hian Drake nihrualin, rapper zinga he chart top 10-a lang thei album ngahah pahnihna a ni ve ta a, ani aia rapper zinga top 10 album ngah zawk chu Future (18) chiah a awm.
Olivia Dean ‘The Art of Loving” chu 56,000 hralh lehin No.3 atangin No.7-ah a tawlh a, chart No.1 hlui Taylor Swift “The Life of a Showgirl” chu 53,000 hralh lehin No.4 atangin No.8-ah a tawlh a, chart No.1 hlui tho KPop Demon Hunters soundtrack chu 47,000 hralh lehin No.5 atangin No.9-ah a tawlh ve ta bawk.
Chart top 10 khartu chu Madison Beer “Locket” a ni a, 43,000 hralhin No.10-ah a debut a, he chart top 10-a a lan vawi khatna a ni. A hmain chart top 40 aia sang a la thleng ngai lo a, 2021 khan a album ‘Life Support’ chu No.65 a kaipui tawh a ni.