Exam result tha neih tuma inelna tha lo tihtawpnan result bu siam dan thlak tum

Exam result tha neih tuma inelna tha lo
tihtawpnan result bu siam dan thlak tum
HSLC leh HSSLC exam result bu-a zirlai top 10, zirlai pass-na division leh letter hmuh dan tihlan thin chu tihlan a ni tawh dawn lo.
School Education minister hoa thuthar thehdarhtute an kawmnaah Mizoram Board of School Education chairman JH Zoremthanga chuan, result bu ah hian school hming hnuaiah zirlai pass-te hming leh roll number chiah tarlan a ni tawh dawn tih a sawi a. School leh zirlaiten result tha neihna atan ngawta by-heart system leh text book rinchhana zirlaite pass thatna tur ngawr ngawr an thlirpui nia lang chuan, zirlaite zirna sang zawk zir tura state dang nen inelnaah nghawng a nei a, kan hniam phah tih chu an hmuh dan a ni tih a sawi.
“He hmalakna hi inelna thianghlim neihna tur a nih rualin, zirna tha zawk a awm theihna atana tih a ni a. School tam takin Board Exam result tha an duh avangin pawl 9 leh pawl 11 zirlai hlamchhiahin, pawl 10 leh pawl 12 question hlui leh syllabus an zirpui a, by heart system-a kal tir thin tih bona atan leh naupangin a thluak leh a rilru a hman tak tak theihna, competency based learning hmanga competitive exam hrang hrang NEET, JEE leh a dangte an hmachawn theihnan hetiang hian kalpui a ni tawh dawn a ni,” a ti.
Tuna an hman tum dan hi CBSE, CISCE leh state tam takin an lo kalpui tawh a ni, tiin, zirlaiten an mark hmuh dan kimchang chu MBSE website atangin an hmu thei vek a, merit list leh rank certificate chu MBSE-in a diltute hnenah a pechhuak thei reng bawk tih MBSE chairman hian a sawi bawk.