NCC Mizoram Hq. hawng

National Cadet Corps Mizoram Group Headquarters chu Ningani khan chief minister Lalduhoma’n a hawng a. Assam state atanga awp thin NCC Mizoram chuan ama pualin Group Headquarters a nei tawh dawn a ni.
Chief minister chuan Mizoram-in NCC Group Hqrs a neih theihnana hma a lo lak tawh dan sawiin, kan thalaiten NCC chu phur takin zawm se, nun kaihhruaina tha hmuhna atan hmang se an duh tih a sawi.
“Ruihhloin kan thalai tam tak a tibuai a, heng thil tha lo lakah hian thalaite kan ven a tul kan ti hle. Thalai fel leh vengva tak tak kan neihten an theihna leh thiamna zau zawkin pho chhuak thei se kan duh a. Chu’ngte ngaihtuah chung chuan Group Hqrs hi nei ve ila kan ti a ni,” a ti.
Hemi hnu hian chief minister hoin Youth Services minister Lalnghinglova Hmar, NER ADG Maj Gen Anurag Vij leh Group Hq. Aizawl commander Brig GS Arora nen an inkawm zui a. An awmna hmunhma tur sawihoin, sawrkarin an awmna tur ram a pek theih chuan an hmunhma chu an insak thei tih an sawi. Ram pawh hi neih hlen tura inpek a ngai loa, luah hawh mai tur chi a ni tih an sawi bawk.
Tunah hian Mizoramah NCC unit pali, cadets 8000 vel an awm a. Group Hqrs nena an awm chuan an ti lian chho zel dawn tih NCC hotute hian an sawi a ni.