India-a Sukhoi Su-57E siam turin Russia nen indawr

India-a Sukhoi Su-57E siam turin Russia nen indawr
Russian aerospace hotu pakhat chuan India leh Russia ramten India-a 5th-generation Sukhoi Su-57E indo thlawhna siam chhuah a theih dawn em tih sawiin technical thilah an indawr mek niin a sawi.
Indian lam atang erawh chuan hei hi engmah sawi a la awm ve rih lo thung.
“Vawiin khan hemi chungchang hi kan sawi tan dek dek a. Hetiang indawrna hi kan lo tawnhriat tawhah chuan kum tam tak lo awm zel tura kan thawhhona than zel tur a ni,” tiin Russia-a United Aircraft Corporation (UAC) CEO Vadim Badekha-a chuan Nilaini khan Hyderabad-a Begumpet airport-a Wings India air show neihnaah thuthar lakhawmtute hnenah a sawi a ni.
Air show-ah hian Russia chuan regional transport aircraft thar, Ilyushin Il-114-300 leh Sukhoi SJ-100 a pho chhuak ve nghe nghe.
Badekha-a hian ram pahnih aiawhte hian ‘tuna India-a SU-30 thlawhna siam chhuahna hmun atang thova Su-57 indo thlawhna siam phalna license pek leh he thlawhnaa Indian industry leh Indian system hman dan tur pawh an sawiho’ niin a sawi bawk.
“Eng pawh ni sela, a taka kalpui tur chuan thil tih ngai a tam a, zirna pawh tha tak neih a ngai a. Tuna thlen chin chu technical thila inrawn bul tanna mai chauh a ni,” tiin Badekha-a hian a sawi niin an sorkar hnuaia TASS news agency chuan a tar lang.
A hmain Russian sorkar hnuaia ralthuam thawn chhuaktu, Rosoboronexport CEO Alexander Mikheev-a pawhin an company chuan New Delhi hi fifth-generation Su-57E indo thlawhna thar leitir bakah India-a siam theih dan tur leh India-in ama puala a siam, AMCA stealth fighter siamnaa puih a inhuam thu a lo hrilh tawh bawk niin sorkar news agency RIA Novosti chuan a tar lang tawh bawk.
Hetih lai hian mi mal, Interfax agency chuan UAC leh Hindustan Aeronautics Limited (HAL) chuan India-a Superjet-100 regional jet siam chhuahna tur inremna an ziak hnai niin a tar lang bawk.
“Lehkhaah chuan HAL hian UAC hi India-a Superjet type certification/validation process-ah a pui ang a. HAL hian SJ-100 siam leh hralh bakah a part leh spare parts tul ang siam thaa enkawlna theihna tur license a nei dawn tih tar lan a ni,” tiin Interfax chuan a tar lang.
October thla khan UAC leh HAL hian India-a Superjet siam chhuahna tura thawhhona, memorandum of understanding an lo siam tawh a. UAC hian a component, unit leh a system chu India-a siamtir lovin Russia atangin an thawn zawk dawn niin Badekha-a chuan a sawi.
“Hei hi kan tan chuan thawhhona huang zauhna a ni a, thlawhna mana insenna titlemtu a ni dawn bawk a. Thlawhna lama thawhhona thar kaina a ni dawn bawk a ni,” a ti.