Congress-in kawngzawhpui nei

Mizoram Pradesh Congress Committee chuan sawrkar laipuiin MGNREGA nuaibo a tum vangte, India rama Kristiante tihduhdahna hluar zel duh loh vangte, Lengpui Airport bul ram inleinaa thil dik lo leh eirukna awm anga lang puangzar tura Mizoram sawrkar nawrna atante Zirtawpni khan ‘Kawngzawh pui’ a huaihawt a, Chanmari atanga Vanapa Hall kawt thleng zawh a ni.
Kawngzawhah hian MPCC president Lal Thanzara chuan, ZPM sawrkarin India rama Kristiante tihduhdah leh nekchepna thleng mekah aw a chhuah ngam loa, ni 100 inhlawhna BJP sawrkarin a pawngsual a, mipui tan ZPM a auchhuak ngam lo tih a sawi a. Lengpui Airport bul ram IAF hnenah dik lo taka hralh chungchangah mipui hmaah thudik an puan ngam loh bawk avangin ni sensa hnuaiah kawngzawh a ngai ta tih a sawi.
“Pathian zarah Congress a sawrkar chuan kohhran aiawhin kan ding anga, MNF leh ZPM sawrkar tihdik loh kan siamtha ang. NLUP changtlung zawkin kan hotuten an kalpui dawn a, chutiang a nih theihnan chuan mipuiin min pui turin ka sawm a ni,” a ti.
AICC i/c Mizoram Dr Chella Kumar pawhin, Congress chuan mipui leh thingtlangmite a ngaipawimawh thin a, an policy pawh chumi lam hawi chu a ni, tih a sawi a. BJP sawrkar erawh fascist takin a kal a, sakhaw innekchep leh tihduhdahna a nasa a. Congress sawrkarin thingtlangmite tana policy tangkai leh din khawchhuahna a duan chhuah – ni za inhlawhna pawh nuaibo a tum mek tih a sawi a ni.
“Centralah Congress kan sawrkar leh a nih chuan sakhaw zalenna kan nei leh dawn a, mitin dikna chanvo humhalh a ni dawn. Congress kan sawrkar leh a nih chuan ram inlei dan felfai lo leh mipui sum tamtak hetiang vanga luangral hi kan chhui dawn a ni,” a ti.
Kawngzawhtute resolution pawm pathum:
8 BJP sawrkarin MGNREGA (ni za inhlawhna), G-RAM-G-a a thlak hi MPCC chuan India hnam pa Mahatma Gandhi hming paih bo tumnaah a ngai a, a dem takzet. State sawrkar tum ve tur 10% hi Mizoram sawrkarin a pek theih loh phei chuan kalpui theih a ni dawn loa, miretheite tan a pawi hle dawn. MGNREGA chu sawrkarin mirethei zawkte hnena a tih ngei ngei tura duan, mipui right a ni a. G-RAM-G chu sum awm dan azira kalpui tur a ni ringawt tawh a, mipui tan a him lo zawk daih. A rang thei ang bera MGNREGA a let leh tura central nawr turin ZPM sawrkar kan phut a ni.
8 Lengpui Airport bul ram hralh leh lei chungchangah eirukna liantham tak a awm niin a lang a. Hemi chungchanga thudik hriat hi mipui chanvo a nih angin Mizoram sawrkar hian a rang thei ang berin thudik puangchhuak thuai rawh se. An party hruaitute zingah mantang ei an awm leh awm loh a rang thei ang bera puang turin ZPM leh MNF party kan phut bawk.
8 BJP leh a thawhpuiten sawrkarna an chan atanga India rama Kristiante tih duhdahna nasa taka pung ta hi Congress party chuan kan dem a. Sakhaw zalenna ram kan nih ang ngeia Kristian-te tih duhdahna hi ti tawp nghal turin BJP sawrkar kan phut. Kristian chief minister dangte anga Kristian-te thlavang hauha che chhuak ve tawh turin Mizoram chief minister kan phut a ni.