Kolasib khawpui kawng khu

Kolasib khawpui kawng khu
Tunlaiin Kolasib khawngpui chhung kawng a khu a, mipuiin hrehawm an ti; tun hnai teah erawh a zia ta a, an lawm hle.
Kolasib atanga thu dawn danin, nikum kum tawp lam atang tawh khan kawng khu hi an tuar tawh a, Aizawl atanga Kolasib luh tirh lam kawngpui atangin Diakkawn thlengin a khu a, kar hmasa tawp lamah khan a zia ta.
Kolasib chanchinbumite sawi danin, khawpui chhung kawngpui siam hna hi nikum November thla tirah a thawktute’n an tan a, Diakkawn leh Aizawl lam atanga luh tirh Leitan inkar vel khawihin, kawng an nawr khawk vak a, chu chu siam zawm mumal loh bakah khua a ro a, mipui tana hrehawm khawpin a khu ta a ni.
“Kawng hi an nawr khawk a, a thawktute sawi dan chuan, alkatra luan ringawt lova siam deuh tak tak an tum avangin an nawr khawk a. Mahse a siam hna hi a chak ta lo a, siam lo chu an ni lo a, a khat tawk chuan an khawih ve. Chutih karah PHE lamin pipe an lo phum bawk a,” chanchinbumi pakhat chuan a ti.
“He kawng hi a chhiat avangin a khu sa a, an han nawr khawk a, ruah a sur lo bawk nen, December atang khan a khu nasa zual a, January-ah pawh a nasa telh telh emaw tih tur a ni,” a ti a, hmun thenkhatah chuan vutah ke a pil thei tih a sawi bawk.
Kar hmasa Ningani vel atang khan ngawrh zawkin hna an thawk a, kawng pawh a dum ve tan a, a khu a zia tawh an ti.