Ruihhlo vangin mi 250 vel khawm tawh
Kum a thar a, Aizawl khawlai a fai deuh vuk. Aizawl hmun lun laiah ruihhlo leh a sulhnu langsar takin a hmuh theih thin a, kum tharah erawh a fai deuh vuk mai.
YMA-in Ruihhlo Do Kum a puang a, kumpuan bawhzuina langsar chu khawlai ruihhlo khawihte khawm a ni. Tun hnaiah mi 250 vel an khawm tawh a, chu chu khawlaiah a lang niin a lang.
Central YMA hnuaia ruihhlo dotu pawl Central Anti Drug Squad (CADS) te’n January ni 20-ah an tan a, January ni 31 thleng khan mi 47 an khawm tawh. A hmain, December thla tawp lam atangin Central YMA-in khawlaiah ruihhlo khawih an lo vai tawh a, mi 202 vel an lo khawm tawh bawk.
“Khawlaia ruihhlo zuar thin te, a khawih thinte kan khawm a, home-a dah an awm a, thuneitute hnena hlan an awm bawk a. Ruihhlo vanga mi heti zat kan khawm hi han ngaihtuah mai pawhin a lang turah kan ngai,” tiin Central YMA hruaitu pakhat chuan a ti.
“Ruihhlo vanga mi kan khawmte hi, ruihhlo khawih tak takte an ni a, khawlaia chetla hriat chian te an ni a, anni’n an khawih loh chuan khawlai pawh a fai ve sawt tur chu a ni alawm,” CADS hruaitu pakhat pawhin a ti.
CADS hruaitute chuan heroin an hma hmasak thu an sawi a, January ni 20 hnuah hawng 36 leh tic tac 119 an man tawh thu, tam an tih thu an sawi.
Ruihhlo vanga mi an khawmah hian a zuar, khawlai tawnga ‘vawrh’ an tih mi engemaw zat an tel thu an sawi a, a vawrh an awm lo emaw an tlem sawt emaw a nih chuan lei tuma khawlai vela kal leh lo chang pawh an tlem sawt turah an ngaih thu an sawi.
Mi an khawmte hi a then chu home-ah an dah a, excise & narcotics department kuta hlan an awm thu leh, a zuarte chu department hnena an hlan zel thu te an sawi. Sim tura insawi, en zui an awm thin thu an sawi bawk.
CADS te hi khawlaiah an vak thin a, Aizawl hmun lun lai, ruihhlo vanga kalkhawm thinte awmna velah an kal thin.
“Thler tin chu kan kal thei lo a, hmun lun lai hi kan fang a, a vawrh leh a lei thinte kal thinna hmun hi a awm a, chungah chuan kan kal tlangpui,” an ti.
A hma chuan Aizawl khawlai, hmun lun laiah ruihhlo sulhnu hi a langsar thin a, chhun engah pawh thil hmuhnawm lo fe fe a awm thin. Tun hnaiah a zia rih a, an fai vek tawh tihna chu a ni lo.