Mizo hmarchate MT 15.2 leikhawm tawh

Mizo hmarchate MT 15.2 leikhawm tawh
Ropuiliani Women Farmer Producer Company Limited chuan December 2025 leh January 2026 chhung hian Mizoram khaw hrang hrang atangin Mizo hmarchate metric ton 15.2 a leikhawm tawh a, heng zinga MT 5 chu phaiah hralh chhawng tawhin, a bak MT 7.5 chu hralh mai tura ruahman mek a ni bawk.
Mizoram State Rural Livelihoods Mission (MzSRLM) hnuaia din Ropuiliani Women Farmer Producer Company Limited member (shareholders) te tharchhuah Mizo hmarchate metric ton 5 chu Rural Development & Administration minister Prof. Lalnilawma’n MIFCO Complex Chhingchip atangin a vailiam.
Mizo hmarcha bik chu ram pawna thawn chhuah a ni tawh thin a, Mizo hmarcha a nihna a lan tawh thin loh avangin Mizoram atanga thawnchhuah a ni tih lantir zel a ni tawh tih minister hian a sawi a. “Kan thlai thar kan thawnchhuah dawn chuan a grading kan uluk a tul a, chuti lo chuan belhchian kan dawl lo anga, rei kan daih dawn lo,”, tiin, tei rei peih tur leh vawikhata hlawk thut tumna rilru pu lo turin a chah. Thlai thar hralhnaah harsatnaa neuh neuh a awm thin chu MzSRLM leh sawrkat atanga leh company atang pawhin theihtawp an chhuah zel dawn tih a sawi a ni.
Ropuiliani Women Farmer Producer Company Limited hi Mizoram State Rural Livelihoods Mission (MzSRLM), RD&A department hnuaia sub-scheme pakhat Mahila Kisan Sashaktikaran Pariyojana (MKSP) Value Chain project kaltlanga din a ni a. He company kaltlang hian MzSRLM hnuaia self help group member hmeichhiate chu shareholders-a ziahluh an ni. Producer company kaltlang hian sawhthing, Mizo hmarcha leh aieng hralhna mumal zawk an neih theihnan hma lak a ni a. Hemi kaltlang hian Mizorama district 7 – Champhai, Khawzawl, Saitual, Aizawl, Serchhip, Mamit, Kolasib leh RD Block 16 – Champhai, Khawbung, Khawzawl, Ngopa, Phullen, Aibawk, Thingsulthliah, Darlawn, Serchhip, East Lungdar, Reiek, West Phaileng, Zawlnuam, Thingdawl, Bilkhawthlir leh Kawrtethawveng RD Block tuamchhuah vek niin, Board of Directors mi 5 leh first subscribers mi 12 an awm mek. He project huamchhunga khaw 154 chuang atangin shareholders mi 6346 an inziaklut tawh a, he company enkawl tur hian staff mi 9 awmin, technical support agency hi Foundation for Development of Rural Value Chains (FDRVC) an ni.
Huam zau leh chak zawka he company hi a kal chhoh zel theihnan member inziahluh runpui January leh February chhung hian MzSRLM leh company staff-ten beihpui an thlak a, hmi hnu hian company chuan February chhungin a member (shareholder) te hnen atangin sawhthing leh aieng leisak leh turin a inruahman.
Kum 2025- 2026 (December 2025 leh January 2026) chhungin he company hian a member district 4, RD Block 5 leh khaw 35 atangin Mizo hmarchate metric ton 15.2 leisak tawhin, tun thlengin heng a leisak zinga MT 5 chu Sus Agri Development Pvt. Ltd Bengaluru hnenah a hralh tawh a ni. MT 7.5 dang hi Relentless Foods Pvt. Ltd. Odisha hnena hralh mai theih turin company warehouse, MIFCO Complex Chhingchhip-ah khawih danglam theihloha (sealed) dahthat a ni bawk.