India-in Venezuelan tuialhthei lei dawn – Trump

mp-a chuan India-in Iran atanga tuialhthei lei duh lovin Venezuelan tuialhthei a lei dawn niin a sawi.
“Inremna leh a kalphung tur pawh kan siam fel tawh,” tiin Trump-a hian Inrinnia Washington atanga Air Force One-a a chawlh hmanna in, Florida a pan laiin a sawi.
Zirtawpni khan US mi pawimawh pathumin Delhi hnenah Russian tuialhthei a lei thin tihtawp thlak nan Venezuelan tuialhthei a leina tur tihfel hnaih a nih thu Reuters an lo hrilh tawh.
India hian US hrekna avangin Iranian tuialhthei hi tam thamin a leisak lo va, kum 2022-a Russia-in Ukraine a rûn hnuah khan khawthlang ramten an hrakna karah a man tlawmin Moscow hi a leisak nasa hle thung.
Trump-a hian August thla khan New Delhi-in Russian tuialhthei a lei nasat avanga hrem nan an bungrua lak luhah chhiah 25% tipungin a hmaa chhiah laksa nen 50% a laksak nghe nghe a. Thla kal ta tir lam khan a lei zel a nih chuan hremna hi a pun tur thu a sawi bawk.
Hetih lai hian January thla khan Treasury Secretary Scott Bessent-a chuan India laka chhiah 25% lak chu tihtawp a ni mai thei tih a sawi a, hei hi Russian tuialhthei a leisak tlem tak vang niin a sawi.
Trump-a hian March, 2025 khan Venezuelan tuialhthei leisak ramte hnenah chhiah 25% laksakin a lo hrem tawh a, Indian pawh hetiang bawka hremah hian a vau a. US sorkar hian kar liam ta khan awlsam zawka US company-ten thlitfim loh an hralh theih nan Venezuela-a tuialhthei industry-te a hrekna chu a hlip then thung.
Trump-a’n Inrinnia India-in Venezuelan tuialhthei a lei tur thu a sawi hian US-India inkar nikum chhung zawnga chhia chuan ziaawm lam a pan hret hret nia ngaihna a siam bawk.
Trump-a hian China pawhin Venezuelan tuialhthei lai tur hian US nen inremna an siam mai thei bawk tih a sawi a. “China hi lo kal turin kan duh a, inremna lian tak siam a ni ang,” tiin a bak sawi chiang lovin a sawi a ni.