India leh EU FTA avangin imported car man tlahniam dawn

India leh EU FTA avangin imported car man tlahniam dawn
India leh European Union chuan Free Trade Agreement (FTA) an tifel ta a, he sumdawnna lama inremsiamna thar avang hian EU ram atanga India-a thil lak luh chi hrang hrang man a tlahniam dawn a, chung zingah chuan imported car duty chu 10% chauh a ni dawn ta a, hei vang hian luxury car man a tlahniam duai dawn a ni.
Tunah chuan car remkhawm sa lak luh hian import duty 70-110 % chawi a ngai thin a, hei vang hian foreign car man hi India-ah a to lo thei lo. Mahse, tuna FTA an tihfel takah hian India leh EU ram ten insumdawn tawnna zalen zawk an nei tawh dawn a, 70-110% importy duty chawi ngai kha 10% a tlahniam dawn ta a ni. Mahse, hetihrual hian kum khatah EU atanga car lak luh hi 2,00,000 chinah chauh 10% hi a ni ang a, electric vehicle tan chuan tun kum nga chhungin he FTA tharah hian chhawr tur an nei ve dawn lo bawk.
Hetiang a nih takah chuan European car company hrang hrang BMW, Mercedes-Benz, Audi, Volkswagen, Skoda, Porsche, Lamborghini leh Ferarri car man te pawh Indian market-ah a tlaniam duai dawn a, German car company Mercedes-Benz performance & luxury model AMG G63, AMG S 63 E Performance leh Maybach S-Class, BMW lamah XM SUV leh Z4 roadster, Audi atangin Q8/RS Q8 te leh, Porsche model hriathlawh 911, Panamera, Macan leh Cayenne te pawh man tlawm zawkin India-ah an lei theih tawh ang. Lamborghini model zawng zawng Italy atanga lak luh Urus, Revuelto leh Huracan te, Ferarri, Maserati leh Volvo car te pawh a man a tlahniam duai tawh dawn a ni.