AMC sum dawn tur state sawrkarin a tikhawtlai lui – Aizawl mayor

AMC sum dawn tur state sawrkarin a tikhawtlai lui
– Aizawl mayor
Finance Commission atanga Aizawl Municipal sum dawn tur chu state sawrkarin tikhawtlai mah se, theihtawpin hmasawnna hna hrang hrang an thawk tho niin Aizawl mayor Lalrinenga Sailo chuan a sawi.
Thawhtannia Mizo Hnam Run inkhawmah MNF hruaitu Lalrinenga Sailo chuan, Aizawl khawpui chu chak zawka hma a sawn theihna turin MNF sawrkar chuan Municipal Act 2008 siamin Aizawl Municipal a din a. AMC chungchangah chuan MNF-in neitu nihna a nei tih a sawi.
Aizawl khawpui hmasawnna tura hmalaknaah Finance Commission atanga sum an dawn chu state sawrkar atanga tihkhawtlai ni mah se, theihtawpa hmasawnna hrang hrang an thawk tih sawiin, AMC hmalakna tha tak avangin cheng vaibelchhe 55 an dawng a. Sum hi a tam tham avangin UD&PA kutah a lut tih a sawi a ni.
“India hmarchhakah Municipal tha ber pawl kan ni a, MNF-in term hnih kan chelh chhungin hmasawnna tam tak kan nei. Khualzin veivak hmuh tlak Aizawl khawpui fai siam kawngah leh Silent City ni thei tura hmalaknaah pawh AMC chuan Trafic Police-te parking leh kawng thawm leh cheimawi kawngah theihtawpin kan thawhpui a ni,” a ti.
ZPM chu kum khat an sawrkar hnu maiah inthlan hrang hrangah an chak zui meuh loa, village council leh local council inthlan chu a hun hma in phur takin an kalpui lui a, beisei an pha lo hle a; LADC inthlanah an chak lo leh a, hengte avang hian AMC inthlan an huphurh a, an tikhawtlai ta rih niin a ngaih theih, tih Lalrinenga Sailo hian a sawi.
MNF kaihhruai AMC hmalakna leh ruling sawrkar dinhmun enin, AMC inthlan turah MNF-in sawrkarna an chan leh ngei a beiseiawm tih a sawi bawk.