India-in Bangladesh tan sum a dah a zahvein titlem

India-in Bangladesh tan sum a dah a zahvein titlem
India chuan a thenawm, Bangladesh nena an inkar a chhiat mek laiin Union Budget 2026-27 a pharh takah an tana sum a dah a titlem a. Rs vaibelchhe 60 dahin kum kal meka Rs. vaibelchhe 120 a dah a, a zahvein a titlem a ni.
Inthenawm ram hnih hi prime minister paih thlak tak, Sheikh Hasina-i’n India a pan hnuah an kar chhiain Delhi hian Dhaka hi an rama hnam leh sakhaw zuitu tlem zawk, Hindu-te a hum zo lo tiin a puh zui a. Hei vang hian a thenawm ram hian Pakistan am a hawi zual nasat phah mek bawk.
Ningani khan external affairs ministry chuan Rajya Sabha rorel inkhawmah Bangladesh-a hnam leh sakhaw zuitu tlem zawkte in, an thil neih, sumdawnna leh an pathian biakna beihna awm nia sawi chu ‘an ngaihven zui zel’ tih a sawi.
Bangladesh-a thil thlengte hi politic leh inpalaia chin fel an duh reng tih External Affairs State Minister Kirti Vardhan Singh-i chuan a sawi a. Prime Minister Narendra Modi-a’n April 4, 2025-a Chief Adviser of Bangladesh Muhammad Yunus-a nen an inkawm tum pawh khan a sawi chhuak tawh tih a saw.
Bangladesh-a Yunus-a kaihhruai sorkar lailawk ding mek chuan Pakistan a hnaih mek zel a, kum 1971-a an ram indanna tur an sual lai atanga inmil lo tak ni mah se Muslim ram pahnih hi an inhnimhnai rih viau.
Kum 2024 khan Yunus-a hian Pakistani Prime Minister Shehbaz Sharif-a chu Egypt-a conference-ah an inhmu a, Dhaka chuan kum 1971-a Islamabad atanga inlak hran tuma indona nasa tak chhuak avanga an inrem lohna chin fel a duh tih a hrilh a. Sharif-a pawhin Yunus-a khawthlir chu lawmawm a tih thu a sawi ve bawk.
Hemi hnuah hian Pakistan leh Bangladesh hian a visa tel lo intlawh theih turin inremna an siam a. Joint Economic Commission (JEC) tinung tharin insumdawn tawnna huang zauh nan Trade & Investment Commission an din thar bawk a. JEC hi nikum khan an thukhawm nghe nghe.
Bungraw phur lawngte an intlawh tawn a, thlawhna hmanga intlawh theihna pawh tan thuai an tum a. Pakistan-a Fly Jinnah leh Air Sial chuan Bangladesh-a thlawh phalna an nei fel tawh.
Ninganiah khan Dhaka atanga thlawk thlawhna chu Jinnah International Airport, Karachi-ah a tum tawh a, kum 14 hnuah ram dang tlawh lova an inkara thlawhna thlawk leh hmasa ber a ni.
India-in ram dang tana budget-a sum a dah zingah Bhutan chu a dawng tam ber tur a la ni a, Rs vaibelchhe 2,289 dahsakin kum kal mekah hian Rs vaibelchhe 2,150 dah a ni.
Union Budget 2026-27 hi Pathianni khan Finance Minister Nirmala Sitharaman-i’n parliament-ah a pharh a, a vawi kua pharhna a ni.