Mizoram share tur a pun chhan…

Tun hnaia Union budget 2026-27 pharh ruala 16th Finance Commission pharh takah khan, Finance Commission hmasa zawk (15th FC) aia Mizoram sum hmuh tur a tam zawk thu chu social media lamah a darh chak hle a.
14th Finance Commission (2015-2020) atana Mizoram share kha 0.46% a ni a, 15th Finance Commission (2020-2025)-ah khan 0.04%-in a pung a, 0.5% a ni a. Tuna 16th Finance Commission-ah hian 0.56% a lo ni leh ta a; finance commission hmasa aia a punna hi 0.06% a ni.
A punna hi finance lam thiamte chhut dan chuan cheng vaibelchhe 1,000 vel a ni awm e. Chumi awmzia chu, state tin ten central taxes an insemnaah hian, a hma aia Mizoram sum hmuh tur punna chu kum tin cheng vaibelchhe 1,000 vel a ni tawh dawn tihna a ni.
16th Finance Commission (2026-31)-a central taxes sem rualnaah hian tehkhawng (criteria) paruk(6) a awm a, chungte chu —Income Distance(42.5%), Population(17.5%), Democgraphic Performance(10%), Area(10%), Forest(10%) leh Contribution to GDP(10%) te a ni.
Income Distance leh Population hian a keng tam fal hle a, hei hi Mizoram chanpual tur a san ve theih lohna chhan lian tak pakhat a ni. Population hi Census 2011 kha rin a la ni a, kan tlemzia chu kan hre vek awm e. Income Distance lah hi per capita GSDP atanga chhut a nih avangin, kan thawk chhuak tam lo nasa si a, kan sâng thei lo hrim hrim a. Kan thawh chhuah tam loh em avang hian, tunhma Mizo lal sawrkar hnuaia khua leh tuite zinga thawkmawh deuh an thawh kep ang mai dinhmunah khan kan ding a. Central lam hian, “Anni hi chu dawmkan an la tul em mai, an thawhchhuah tam lam atanga an chanpual tur hi kan chhutsak chuan an chang tlem dawn lutuk a, khawngaih mark (grace mark) pe mai ang u” an tihna a ni ber. (States with a lower per capita GSDP will receive a higher share on this parameter, to maintain equity among states).
Kan hmuh tur a pun chhan hi kan thawhchhuah tam ve tak vang ni lo, kan la hnufual tluan zel vang a ni a; a lawmawm dan hi a tlawmthlak ti pawhin a sawi theih ang a, hawi champ viau theih pawh niin a lang lo.