Russia-in Ukraine power hmunpui a beih nat ber tum thlentir

Russia-in Ukraine power hmunpui a beih nat ber tum thlentir
Russia chuan kumina Ukraine-a an energy hmunpui ‘an beih nat ber tum’ an thlentir niin mi mal energy company, DTEK chuan a sawi.
Missile leh drone hmangin Kyiv leh hmun danga power plant leh hmunhmate an bei nasa a, hei hian thil nasa takin a tibuai niin an sawi.
Ukraine-ah hian khaw vawh lam chu -20°C vel ni mekin khawpui bera mihring chenna in chhawng sang 1,000 chuanga mite chuan intihlumna tur an nei lo va, khawchhak lama Kharkiv khawpuia power plant phei chu siam leh ngaihna awm lo khawpin a chhia tih an sawi.
President Volodymyr Zelensky-a chuan Russia hian indawra indo tihtawp aiin ‘firfiaka chet leh boruak tihsat’ an tum nia puhin an thawhpui ramte chu ‘na thei ang bera’ Moscow nawr turin a ti.
Russia-in Ukraine power hmunpuite a beih chiam hi Donald Trump leh Vladimir Putin-a ten chawlhkar tawpa ‘energy truce’ inremna an siam a tawp hnuah a ni a. Nato Secretary-General Mark Rutte-a’n Kyiv paa President Zelensky-a hmu tur leh an ram parliament-a thu sawi tura a zin chhuah ni chiah a ni.
Trump-a’s ‘energy truce’ tia a sawi hi inbiakna a awm zui theih nana a tih a ni a. Russia leh Ukraine aiawhte hi US aiawhte nen kartawpah hian Abu Dhabi-ah an inbe dawn nghe nghe.
He inbiakna turah hian Russia hian eng ang thu nge a ken dawn hriat a la ni lo.
Thawhtanni zana Russia-in nasa taka a beih hi mi chengte chuan zan lai pelh hret atang niin a hnu darkar sarih chhung chu air raid siren a ri zui a, a puak mawlh mawlh niin an sawi.
Mi cheng tam tak chu metro station-ah an him nan an tlan lut hlawm a, thenkhat chuan puan in keng telin khaw vawt lutuk laka an him nan an kai pharh hlawm bawk.
Zelensky-a chuan ballistic leh cruise missile 70 chuang hmanga kah an ni tih a sawi a, hei hi a hma lama zan khata an beihna aia tam daih niin drone 450 nen an che tih a sawi.
Ukrainian Air Force chuan missile 38 chauh an lo kap thla thei tih sawiin tam tak chuan an tum a fuh hlawm tihna a ni.
Thuneitute chuan an ram chung zawn veng turin missile an tlachham tih an sawi a, Ukraine hi US siam Patriot missile-a innghat deuh ber an ni.
“Kan chung van sang ven nana a hun taka missile dawn leh nunphung pangngai vawn him hi a pawimawh hmasa ber a ni,” tiin Zelenksy-a chuan Thawhlehni tuk khan X-ah a tar lang a. “Russia hi nawr chep hle a nih loh chuan indo hi a tawp dawn lo,” a ti bawk.
DTEK chuan Odesa-a mi nen an power plant pahnih kah fuh a nih thu an sawi a, October hnua an hmunpui vawi kua beihna a ni tih an sawi.
Kyiv, Dnipro leh hmun danga sorkar hnuaia awm power hmunte pawh kah fuh an ni a, an chhe nasa hlawm hle bawk.
DTEK chuan plant thenkhat chu intihlumna atan bik chauhva duan a ni a, electricity atan a ni lo tih an sawi a, hetiang chi phei chu vantlang tan a pawimawh hle niin an sawi a. Geneva Convention pawhin vantlang mamawh hmuhma beih hi indonaa dan bawhchhiatna tiin a tar lang a ni.
Hmunhma chhiate hi siam that a hautak thin a, hei hian mi tam tak buaina thlenin power neih mumal loh a hring thin a. Engineer-te chuan zanah pawh an thawh a ngai thin bawk.
Tun tuma Russian-te chetna avang hian chena chhia pawh a awm nual a. Ukraine-in missile an lo kah thlakin a per avanga kangte pawh a awm a, hliam tawrh phah pawh an awm.