PWD Engineer thu ziak Tha zet kha!

Lalremliana Pachuau

ZPM sawrkar hnuaiah sawrkar hnathawk, an ngaih dan tak ngial pawh vantlang hmaa sawi chhuak ngam ngai lo thinte khân, huaisen takin an ngaih dan an rawn sawi ngam ta a. Chung zinga pakhat chu PWD Engineer a ni. He Engineer hi PWD Minister pui tura MLA an dah pakhat zawkin, sawisel mai lova hetiang thu pawimawh ziak uar deuh deuh tura he Engineer a rawn fuihte hi, kan rama thil thleng ngai lo a ni.
He Engineer hian a thu ziakah, kawng chungchanga PWD Engineer lamin sawisel an tawh nasat thinzia, dik taka hna pawh thawk duh lo anga mipuiin kan chhuah thin chu, a dik famkim lohzia a rawn sawi a. Mipuiin Engineer-te kan puh chhiat ang vek an nih bik loh thu, thil tha duh tak tak an awmzia a rawn sawi chhuak ta a nih hi.
|ha leh tlo thei ang bera kawngpui siam an duh ve thin laiin, Congress leh MNF Ministry hnuaiah chuan Engineer lamin kawngpui siam dan tura an duan ang pawmsak an nih loh thin dan, an rawtna siam pawmpui an nih loh dan, tu tu emaw lo inrawlh an chinzia leh, chu chuan kawngpui tlo a awmtir theih loh phah thin thu huai takin a rawn ziak ta a ni.
Tun hma lamah MLA thil tih theih dan azira, kawngpui siamna tur pawisa sem ral a nih thin dan te, ka bial ka bial tia MLA lamin mahni leh anmahni thlawptute tih lungawi an tum thin dan, official lam pawhin an chhûngte leh an duhsak zawngte haivur nân taka PWD sum an chalai thin dan zawng zawng a rawn ziak chhuak ta a. Hetianga ram hmangaihtu sawrkar hnathawk hi, Zoram hian kan mamawh tak zet zet a nih hi.
Kawng pawimawh leh mipuiin kan chhawr ber ber kawngpui siam aia, inthlan hmaa an lo intiamna anga an sawrkar hnua kawngpui pawimawh lem lo, mipui tam berin kan chhawr tur pawh ni hlei lo, sum siamna ni pahfawma thuneitu lamin kawngpui an siam thinna a reh tak thu thlengin a rawn ziak chhuak a. Langtlang sawrkar kan hmu tih loh rual a ni lo.
Tunah chuan Engineer lamin duhthusama thaa rawtna leh, ruahmanna an siam anga sawrkar lamin kawngpui an siam takah chuan, Aizawl khaw chhûng kawng an siam tawh chinte chu tlan nuam tak, black topping pawh chhah tha elh awlh tak an ni ta a nih hi. Hetiang zel hian sawrkar hnathawkte hian hna thawk thin se, sawrkar lam pawhin an thu leh hla ngaichâng chungin, ei rûk leh hlawkna lo tel tum phét lo hian hna hi thawh ni thei zel tawh se, ramin hma a va sawn nasa dâwn êm!
Sawiselna tam tak kârah (an selna zawng zawngte erawh a dik vek kher em?) ZPM sawrkar hian hna tha tam tak a thawkin, a thawk mek reng a. Tun hma lama kan hriat ngai loh, hmuh ngai loh kan hmu nasa em em a nih hi. MNF leh Congress sawrkar hun lai nena khaikhina, a tha zawnga danglamna thlengte hmu duh lo lui tlatte hi zawng, vai pathian siam theih loh ang mai an ni e.
MNF leh Congress hnuaiah kha chuan, CM ngeiin PWD an chang a. Kan Engineer sawi ang hian, kawngpui tlo leh tha siam tum aiin, inthlan hmaa intiamna, sangawizawnpuite tih lawm tumna, chu mi paha hlawkna tel tum zawng hlirin kan kawngpuite siam an ni thin a nih kha. Boulder supplier thlengin sawrkarin a duhsak zawngte a haivur a. Lung chhe tak tak, hlawk thei ang bera supply thinnate kha tun sawrkarah hian reh hlen hmak tawh se, a va lawmawm dâwn êm!
Kan Politician zingah Statesman dik tak, ro rêl thiam leh ram hmangaih tak taktu, mahni inlak hausak nân ngawta politics khel tawh lo an pung tulh tulh a. Kum rei lo tê chhûnga hmasawnna hnathawh kan hmuhte hi, mi sual ber leh mi dik lo uchuakte tân lo chuan, hmuh hmaih theih an ni lo. Sawrkar hnathawkte pawh huaisen tulh tulh rawh se. Dawihzepna aiin Dikna a ropui zawk a. Ngawih reng aiin thu takin lukhawng a nei zawk thin. Dept danga kan hnathawktute pawhin, mipuiin kan hriat dik loh leh hlep hmangte avanga hna an thawh that theih thin loh dan tlangaupui ngam zel turin, kan fuihin duhsakna kan hlan mawlh mawlh a ni e.