Pharmacy zirchhuakte thlah

Pharmacy zirchhuakte thlah
Laithangpuii College of Pharmacy chuan anmahni hmun Durtlang-ah Zirtawpni khan Diploma in Pharmacy (D.Pharm) zirchhuakte thlahna – 10th Graduation Ceremony an hmang.
Hmanpuitu adviser to chief minister (Finance) TBC Lalvenchhunga, MLA chuan an thiamna tangkai leh hlu zawka an hman theihna turin uluk leh thahnemngai taka thawk turin graduate tharte a fuih a. Sawrkarin healthcare industry a thuam chakin, hma lak zel a ni a, pharmacy graduate thar leh la zir mekten hma hun eng tak an nei tih a sawi.
He college principal Lalchhuanmawii report danin, zirlai 57 zingah 54-in hlawhtlinna changin, top 10-ah zirlai 9, distinction-a pass 19, first division 35 an nei a, pass percentage 94.7% a ni.
Laithangpuii College of Pharmacy hi kum 2014-a din a ni a, Pharmacy Council of India hnuaia affiliate a ni. Zirlai 417-in D.Pharm an zirchhuak tawh a, tunah hian zirlai 120 an awm mek.
Zirlai chhuak ta te hi hmun hrang hrangah an thawk a, Mizorama damdawi in, sipaiah leh Japan-ah te lutin, a thenin entrepreneur kawng zawhin damdawi dawr siama hlawhtlin ta pawh an awm tih sawi a ni.