Trump-Xi inbia, Taiwan-a ralthuam hralhah fimkhur turin inchah

Chinese hruaitu, Xi Jinping-a chuan Taiwan chu China-US inkungkaihnaah ‘pawimawh ber’ a nih thu phone-a US President Donald Trump-a nen an inbiaknaah a hrilh.
Xi-a hian Trump-a hnenah hian thliarkar hnenah hian ralthuam a pek chu ‘fimkhurpui’ turin a ti niin sorkar chanchinbu chuan a tar lang a, Washington nena an inkara thil pawimawh ber a nih thu leh an inkara inhriat thiam lhna awmte pawh a chin felna a awm theih a beisei thu a sawi bawk.
Trump-a chuan Nilainia an inbiakna hi ‘tha lutuk’ tia sawiin ‘rei leh rintlak’ tiin a sawi bawk.
Ram pahnih hruaitute an inbiak hma lawk hian UK Prime Minister Sir Keir Starmer-a telin khawthlang ram hruaituten China an tlawh hlawm a, khawvela economy lian ber pahnihna nen hian inkungkaihna siam dan an dap hlawm.
Trump-a pawh hian April-ah China a tlawh dawn a, a zin tur chu ‘nghahhlelhawm tak’ niin a sawi.
Beijing hian US bekeng tonne maktaduai 20 lei a tum niin a sawi a, a hmaa tonne maktaduai 12 a lei thin aia tam daih a ni.
“China nena kan inkungkaihna leh keimah bik leh President Xi-a inkungkaihna hi a tha hle a, hetianga inkawp tha hi a pawimawhzia pawh kan hre dun a ni,” tiin Truth Social-ah a tar lang.
Taiwan leh bekang bakah hian Trump-a leh Xi-a hian Russia-in Ukraine a beih mek, Iran-a thil thleng mek leh China-in US atanga tuialhthei leh boruakalhthei a lei chungchang te an sawi bawk niin US president chuan a sawi.
Xi-a hian mahnia ro inrel hrana awm thliarkar, Taiwan chu ‘China ram’ tiin a sawi a, Beijing chuan ‘Taiwan ram bil nihna leh an inpumkhatna a vawng him zel dawn’ tih a sawi.
“US hian Taiwan hnena ralthuam a hralh hi fimkhur taka a tih a ngai,” a ti.
China hian Taiwan nena ‘inzawm leh’ hi a tum reng a, tharum hmanga tih mai pawh a hnial vak lo.
US hian Beijing aiin Taiwan hi a kawmngeih zawk a, Taiwan-in ram dang atanga ralthuam a leisak tam ber ram an ni nghe nghe.
December khan Trump-a sorkar hian Taiwan hnenah rocket launcher, self-propelled howitzer leh missiles chi hrang hrang telin ralthuam $ tluklehdingawn 11 man hralhna tur a tifel.
Beijing chuan hei hi ‘Taiwan indan tum thlawpna’ tia sawiin Taiwan Striat vel hlauhawm leh tharum thawhna thlennaa siam thei niin a sawi bawk.
Xi-a chuan, “Lehlam lehlam hi intlukin, inzahtawn leh hlawkpui dan tur inanga kawng pakhat an zawh chuan kan buaipui hi a chin felna tur kan zawng chhuak thei em em ang,” tiin Trump-a hnenah hian a sawi.
Ningani khan Taiwanese hruaitu, Lai Ching-te chuan US nena an inkungkaihna chu a la nghet tha a, hmalakna an neih pawh an chhunzawm zel tih thuthar lakhawmtute hnenah a sawi ve bawk.
Xi-a leh Trump-a inbiak hnuhnung ber hi November niin Chinese president hian zin turin a sawm.
Ram pahnihte hi nikuma chhiah inlaksak, chip leh leilung hausakna vâng chi avanga an inmil loh deuh hnuah tun hnaiah an intitha leh tan mek.
Trump-a nena an inbiak hma lawk hian Xi-a hian Russian President Vladimir Putin-a be bawkin Beijing leh Moscow inkar tha zel chu lawmawm an tih thu an sawi dun.
Russian chanchinbute chuan Putin-a hi Xi-a hian kumin kum chawhma lama China-a zin turin a sawm niin an tar lang.