TPUSA ‘All-American’ Halftime Show

Super Bowl LX Halftime Show-a Bad Bunny perform tur hi conservative lamin an duh loh thu an tlangaupui nasa hle a, US President Donald Trump pawhin Bad Bunny a ngainat loh thu hi a zep lo. He halftime show counter turin Turning Point USA chuan ‘All-American’ Halftime Show an buatsaih ve thung a, he show hi Super Bowl Halftime Show nena inrual tura an duan an ni.
TPUSA All-American Halftime Show-ah hian TPUSA dintu, nikuma an kahhlum tak Charlie Kirk chibai buknain bul an tan a, US Department of War hotupa Pete Hegseth rawn inlan zuaiin, “Pathianin kan pasaltha te malsawm rawh se,” tiin camera lamah ball a vawm chhuak a.
He show hi TPUSA YouTube channel-ah tihchhuah niin, mipui maktaduai 5 chuangin live-in an, channel dang atanga en zawng zawng nen chuan he programme live-a entu hi maktaduai 10 dawn an tling ve thei tlat a ni.
Brantley Gilbert tawiawmtu band guitarist-in ‘The Star Spangled Banner’ instrumental version-in show a hawng a, chutah Gilbert rawn chhuakin “Hei hi America dik tak chu a ni,” tiin “Real American” tih hlain bul a rawn tan. A hla hit ‘Dirt Road Anthem’te pawh a rawn thlawh.
Gilbert dawttah Gabby Barrett rawn chhuak velehin, 2020-a a hla hit ‘I Hope’-in bul a rawn tan a, “The Good Ones’ a perform bawk. Chutah Lee Brice stage-ah rawn lang ve lehin, 2014 hla hit ‘Drinking Class’ a rawn perform a, Charlie Kirk-a’n mitam takin an rilru an puan chhuah theihna hun remchang a siam sak thin thu te a sawi a, “Country Nowadays” leh “Hard to Love” a perform leh bawk.
A tawp berah Kid Rock-a’n 1998-a a rawn lar chhuahna hla ‘Bawitdaba’-in bul a rawn tan a, Cody Johnson hla “Til You Can’t” a rawn cover bawk.