Him taka thlawhna chhia tumpuitu pilot-in fak hlawh

Somalia-a airline chuan an thlawhna khalhtu zinga pakhat, a khawl lam buai avanga harsatna tawka an ram khawpuia international airport bul tuipui kama him taka tumpuitu chu an fak hle a, a chuang mi 55 chu him takin an chhuak vek a ni.
Starsky Aviation chuan thlawhna khalhtu ngaihtuahna chak tak avangin passenger 50 leh thawktu mi panga an him phah tih an sawi.
Thawktu zinga mi pakhat, kum 50 mi chuan Thawhlehni tuka Mogadishu atanga an thlawh chhuah hnu lawkah harsatna an tawk tih a sawi a, Somalia-a Civil Aviation Authority (CAA) chuan thlawk kir leh turin an ngen.
Lei an rah chuan tlankawngah a ding thei ta lo va, thlawhna tlankawng tawpa a hungna chu thlawh kân leh thei hramin a bula tui awmnaah an tum ta niin CAA Director Ahmed Macalin Hassan-a chuan a sawi.
Thlawhna hian eng harsatna nge a tawh chiah erawh la hriat a ni lo.
X-a thlalak thehdarhah chuan passenger-ten thlawhna chhuahsanin Indian Ocean vaukama thlawhna chhia atanga kea an kal lai a lang a, tumah hliam na pawh an awm lo.
Somalia-a African Union mission chuan chhanchhuah hna thawhnaa pui turin UN leh AU sipaite tirh an ni tih an sawi a. Somalia-a transport minister pawhin a hmun hi a thleng nghal bawk tih X-ah hian tar lan a ni.
“Passenger leh thawktu zawng zawng an him tih hriat chuan kan thaw huai a. Hmanhmawh taka tum ngai turin eng harsatna nge an tawh tih chhui zui nghal mek a ni,” tiin Starsky thupuangtu, Hassan Mohamed Aden-a chuan a sawi.
“A khalhtuin chiai lo leh rilru fim tak pua a chuangzawng zawngte himna atan thutlukna a siam a, hun khirh taka a chet dan avangin a fakawm hle a ni,” a ti.