V-Day-ah thisen unit 614 pe

February 14 – Valentine’s Day denchhenin Association Voluntary Blood Donation (AVBD) bultumin Mizoram hmun hrang hrangah a thlawna thisen pek runpui huaihawt a ni a, thisen unit 614 pek a ni. Kum 2010-a hman tan atangin kumin thlengin he ni denchhen hian a thlawnin thisen unit 12235 pek a ni tawh.
Aizawla Valentine’s Day Blood Donation Camp hmanpuitu MLA Jeje Lalpekhlua chuan, Mizote chu tlawmngai hnam kan ni a, kan tlawmmgaihna avangin kawng engkimah Mizo nih a nuam thin, tia sawiin, “Thisen pek hi tlawmngaih lan chhuahtirna remchang tak a ni a. Thisen pek a hlauhawm lo a, Mizo zingah thisen vawi tam tak pe tawh mi thahnem tak an awm a, chu’ngte chu tuna thalaite hian entawn ila, midang tan malsawmna ni a, mi nunna chhan turin thisen pek uar zel ang u,” a ti.
Valentine’s Day denchhena thisen pek hi kum 2010 khan Mizoramah tan a ni a, bul tantu chu TV anchor thin, AMC corporator ni mek Zikpuii Pachuau niin, “Blood for your Valentine” tih thupuia hman a ni. Kum 2010 atangin kum tin buatsaih a ni ta a, a hnuah AVBD-in a kutken zui a, MSACS leh Blood Bank-te nen thawkhoin buatsaih thin a ni. Kum 2013 atangin district dangah pawh tih tan a ni a, thupui atan “Show Love, Give Blood” tih hman a ni.
V-Day thisen pek:
Aizawl – 277
ZMCH – 71
Lunglei – 86
Siaha – 33
Champhai – 80
Serchhip – 34
Lawngtlai – 33
Total – 614