Sum lengvak vanga sawi hi central policy vang zawk ani – Lok Sabha MP

Sum lengvak vanga sawi hi
central policy vang zawk ani
– Lok Sabha MP
ZPM sawrkar hnu ah sum lengvak a vang nia sawi chu an sawrkar vang niloin, central policy-a cashless kalpui uar zel tum vang zawk a ni tih Lok Sabha MP Richard Vanlalhmangaiha chuan a sawi.
Thawhtannia ZPM party office-a inkhawmah Lok Sabha MP chuan, kum 2047-ah India zalen hnua kum 100 a tling dawn a, tunah ‘developing country’ a ni a, kum 100 a nih meuh chuan sawrkar laipuiin India chu ‘developed country’ a hlankai a tum a. Sawrkar a inbuatsaih nasa a, nakinah phei chuan Vikshit Bharat hi an la sawi nasa tulh tulh dawn a. India ram zawng zawng he policy hian a huam a, chu policy-a an kalpui pakhat chu ‘cashless’ a ni tih a sawi.
“Tute emawin, ZPM sawrkar hnuah pawisa a vang, an ti a, min beihna atan an hmang a. ZPM sawrkar vang a ni lo, hei chu central policy a ni. Cashless hi an kalpui zel dawn a, 2047 hmaa pawisa note zawng zawng tihbo vek an tum a. Chu chu India policy a ni tih hria ila. Chu chu a thatna chu, pawisa print-na atan mi tam tak an ruai a, khawl nen, kha khan hna a titam. Pawisa lem a awm thei tawh dawn lo bawk,” a ti.
Kum khat leh a chanve Lok Sabha MP a nih ve tawh chhunga central atanga project hrang hrang atanga an sum pawhchhuah tawh chu a vaiin Rs. 457,47,81,000 a ni tawh tih Richard Vanlalhmangaiha hian a sawi a. ZPM an vanduaina chu, an sawrkar laia eptute constructive opposition ni lo, destructive opposition an ni a, an thil tih that an hmu thei loa, dawt hmangin an bei a, reilotea hailan a ni lehzel thin, tiin a sawi.