Assam Congress MLA vawi thum ni tawhin Raijor Dal zawm

Congress MLA vawi thum ni tawh, Assam-a Goalpara West bialtu ni mek, Abdur Rashid Mandal-a chuan regional political party Raijor Dal a zawm a. Assembly inthlang tura inbuatsaih mek laiin Assam Congress state president hlui, Bhupen Bora-a chu a lo bâng tawh bawk.
Mandal-a hian Raijor Dal chief leh Sivasagar MLA Akhil Gogoi-a chuan lawm lutin an party tan ‘ni chhinchhiahtlak’ a nih thu a sawi.
“Hruaitu thalai leh chak tak, left ideology zawmtu, Akhil Gogoi-a kaihhruai Raijor Dal party zawm theia ka hlimtak zet a, zirlai ka nih lai ang mai a ni,” tiin Mandal-a chuan a sawi.
Mandal-a hian Raijor Dal chuan mipuite leh an huam chhung tan hna thawh theihna zau zawk a pek a beisei tih a sawi a. Congress lakah lungawi lohna a nei hran lo va; mahse, Raijor Dal chuan hna thawh theihna hun leh hmun tha zawk an pek an tiam niin a sawi.
“Congress chu party lian, national party a ni a, hruaitu pawh tam tak nei an ni a. Party chhungah lungawi lohna ka nei hran lo va; mahse, he hmunah hian mipui leh party tan hna thawh theihna hun leh hmun zau zawk nei thei dawnin ka inhria a ni,” a ti.
Gogoi-a chuan Mandal-a’n a zawm chu an party tan mellung pawimawh leh Assam Legislative Assembly-a an punna tur anih thu a sawi a. Congress MLA hlun tak dangin an party chu an la zawm leh dawn niin a sawi bawk.
“Naktukah (Thawhlehni) hian Baghbor bialtu MLA vawi thum ni tawh, Sharman Ali Ahmed-a’n kan party a rawn zawm dawn a. Naktukah hi chuan MLA kan neih zat hi pakhat atangin pathum a ni tawh ang,” tiin Thawhtanni khan a sawi.
Gogoi-a hian kumin inthlanah hian Raijor Dal chuan nasa taka hma an sawn a beisei thu a sawi bawk a. “Kumin inthlanah hian MLA 15 vel neih tumin kan bei a, kum 2031-ah chuan sorkar siam tumin kan bei tawh dawn a ni,” a ti.