Sawhthing chingpenna ngaiah buai leh Support price beisei lo tan a hralh theih: – Agriculture minister

Nikum lama Burma sawhthing lakluh, mahni sawhthing thar anga lantir tumna velah bawk kuminah buaina a awm leh a, support price beisei leh tur ni lo tan chuan tunah pawh sawhthing hi mahni duhdanin a hralh theih reng tih Agriculture minister PC Vanlalruata chuan a sawi.
Nilainia Assembly Session-ah East Tuipui bialtu MLA Ramthanmawia chuan, sawhthing hralh turin society-a tel ve lem lo, price support beisei bawk lo, sawhthing hralh duhte checkgate-ah dan an ni sawi a awm thu a sawichhuak a. A bial chhungah society-a inziaklut mai ni lo, ZMP membership fee an pek loh chuan, lawmluh ni a an din loh chuan, sawrkarin sawhthing a leisak dawn lo tih sawi a awm thu a sawichhuak bawk.
Mizoram Agriculture Marketing Board (MAMB) chairman ni bawk PC Vanlalruata chuan, kuthnathawktuten an sawhthing thar man man taka an tel theihna tur policy an nei a, chumi tur chuan sawrkarin hma a la a, system siam a ngai a, tunhma sawrkara la awm ngai lo a nih avangin thil thar a ni a, protal siamin, Secondary Collection centre (SCC) an siam a, a tumkhatna atan nikumah an kalpui tan tih a sawi.
“A vawikhatna a nih avangin MAMB-in ruahmanna tam tak a siam zingah thil fel lo lai pawh a lo awm a, chuvangin fimkhur takin kan kalpui. Sawhthing lei duh an awmin lei phal loh a ni, tih lam thu dah a awm loa, hunbi erawh kan tuk. Support price beisei lo chuan an hralh thei reng a, englai pawhin an hralh a ni. Nikuma kan buaina bawk Burma sawhthing lakluh avangin tunah Champhai lamah tho tun tum thil pawh hi thleng a ni,” a ti.
Tute emaw in tlawm te te in Burma sawhthing an lei a, SCC-a thawktu thenkhatte nen inthurualin anmahni thar angin support price hmuh tumin an lo bei a, Aizawla an office atanga an enchianin, SCC atanga an thar tur zat bituk sa aia tam daih portal-ah an lo upload a, hei hi a dik lo tiin, Investigation Team dinin social audit an ti a, portal lamah chuan a lo chingpen hman ngei a, MAMB-in District Agriculture Marketing Committee (DAMC) ah support price tur a lo pekchhuak hman a, DAMC hian heng mite hnenah hian sum an lo pechhuak hman lo hlauh a, a thu in chingpen mah se, a takah chuan an pechhuak hman loa, an vannei ta tih MAMB chairman hian a sawi.
Sum chingpen a awm hman loh avangin tu chungah mah action lak a ni loa, Investigation Team-in complaint lut hi an la chinfel kim loh avangin thil sual tih tum nia hriatte hming tarlan a la rem loa, Investigation Team-in a chinfel tawh, a recommend ho erawh support price hi pek zel an ni tih a sawi bawk.
Mahni sawhthing thar ni lo, an thar anga lakhawmna hi – Farkawn SCC, Khuangleng SCC, Cold Storage New Champhai SCC leh Ramhrangkawn SCC (Champhai district vek) a ni tih a sawi a ni.
House leader, chief minister Lalduhoma chuan East Tuipui bialtu MLA-in ZPM membership pe lo tana sawhthing hralh theih loh tih lehkha copy a neih chu a copy pechhawng ve turin a ngen tih House-ah hian a sawi a. A dik a nih chuan action an lak tur thu leh, phuahchawp pawh nise an umzui tho tur thu a sawi a ni.