Ruihhlo manin dan dika kalpui a tul – CYMA general secretary

Ruihhlo manin dan dika kalpui a tul
– CYMA general secretary
Ruihhlo man danah dan dik taka kalpui a tul hle tih Central YMA hruaitu Prof. Malsawmliana chuan a sawi.
February 17 zana YMA Venghnuai Branch-a YMA Kumpuan – ‘Ruihhlo Do’ a hawnnaah Central YMA general secretary Prof. Malsawmliana chuan, kan ramin ruihhlo leh a kaihhnawih avanga harsatna leh thalai tam takin nunna an chan avangte, chhungkaw keh chhia a thleng nasa lutuk avangte in YMA chuan ruihhlo do a puang a. Ruihhlo do tura YMA pen chhuahnaah rinawmna, teirei peihna leh inpekna, thawhhona tha a pawimawh tih a sawi.
“Ruihhlo ti tlem tura beihna, supply reduction bakah a la ti ve lo te venhim leh zirtir kawngah YMA-in theihtawp chhuah a tul a, ruihhlo ngai enkawlna kan neih leh YMA-in mamawh thulha indah luh zung zung theihna Home puibawm that an tul a; ruihhlo man danah dan dik taka kalpui a tul,” a ti.
February 17 zan veka YMA Ramthar Veng Branch-a ‘Ruihhlo Do’ kumpuan hawngtu Central YMA president R Lalngheta chuan, heti taka thalaite min sawisak saktu ruihhlo leh a rawn laluttute, helaia zuartute chu enliam mai theih an ni ta lo a, kan ram a dam lehna atan heng ho do tur hian YMA chet chhuah a tul tih a sawi.
“Ruihhlo ngaite hi tih takzeta kan beih chuan an chhanchhuah theih a, YMA-in an man, home-ah an dah a, councelling an pek zingah tha chhuak an tam tawh a, heng mite chhanchhuak tur hian hmangaihna leh dawhtheihna nen theihtawp kan chhuah a tul a, a la ti lo ten an tih ve chhin lohna atana venghim tura theihtawp kan chhuah hi a tul,” a ti.