Khawsak harsa zual tan card sen-a awm theihna siam belh

Khawsak harsa zual tan card
sen-a awm theihna siam belh
Food Civil Supplies & Consumer Affairs minister B Lalchhanzova chuan, khaw tinah khawsak harsa zual deuh, card eng/ pawla thun theih tawh si loh tan card sen-a luh theihna hawn leh mek a ni a; hemi hnua tih hmaih an awm a nih chuan district civil supplies officer-te mawh a ni dawn tih a sawi.
Ningania Assembly Session-ah zawhna chhangin FCS&CA minister chuan, National Food Security Act (NFSA) hnuaiah buhfai a thlawn/ man tlawma la thei mihring quota Mizoram-in a neih 706296 chu khawsak harsa zual tak tak chu khung leng vek awm kan nih laiin, NFSA quota-in a la daih loh ‘mirethei’ kan la thahnem hle tih a sawi.
“Chinfel kan tum a, kan beisei nasa a, hlawhtlin erawh a har. A chhan chu, party induhsakna angin kan lo inhum nasa a, keini chu kan awm thei deuh alawm, an ni hi card pawl-ah awm rawh se, ti phal pawh kan awm lo,” a ti.
Sawrkarin ‘Mizoram State Special Ration Package’ ruahmanin kg. ah Rs.20-a khul thei tur ‘card sen’ siam a ni a, khawsak harsa, card var-a la awm si mi 70000 vel an khung tawh a. Department chuan allotment thar 60000 vel a chhuah leh tawh tih B Lalchhanzova hian a sawi.
“DCSO tinah an huamchhungah khawtlangin dinhmun harsa nia an sawi, card var-a la awm te thun turin tih a ni a, card sen-a an thun lo a nih chuan DCSO mawhphurhna a ni tawh ang, kan ti a ni,” a ti.
Retailer-ten buhfai an khul chhuah tawh, a latu turten an lak loh avanga an lo vawnhim ngai awm chu retailer-te tan harsatna a siam thin avangin, thla 10 chhunga vawi khatmah buhfai la lo chu an buhfai khul tur hi kudam atangin pe rih lo se, an khul duh hunah an quota hi pek leh mai tura tih a ni tih a sawi bawk.