Mobile signal awm lo khua 37 BSNL nen kan bawhzui mek – Chief minister

On Feb 20, 2026 0 0

Mobile signal awm lo khua 37
BSNL nen kan bawhzui mek
– Chief minister
Sawrkar chhinchhiah danin Mizoramah mobile/ internet signal awm lohna khua 54 a awm a, heng zinga khaw 21 chu rauhsan, mihring awm tawh lohna a ni. Hemi ang chuan khua luah mek 33-ah mobile signal a awm lo tihna a ni a, sawrkarin a chhinchhiah tel loh khaw 4 a awm a, a vaiin khaw 37 a ni tihna a ni.
Assembly Session-a hemi chungchang sawinaah chief minister Lalduhoma chuan, he thil hi an ngaipawimawh hle a, Information & Communication Technology department hmalakna bakah CM Office atangin an bawhzui a, BSNL nen hma an la a, a dang pawh an theih ang angin an bawhzui dawn tih a sawi.
“Tuna hma kan lak mekna in a huam loh chu khaw 20 vel bak a ni tawh loa, hma kan lo la zui ang. Hei hi kan tih zawh phei chuan India ramah pakhatna kan ni dawn a, ‘digital state’ hmasa ber nih tumin tan kan la a, atficial intelligence-ah pawh tan kan la a ni,” a ti.
MLA-ten an ngaihpawimawh zual list pe se, theihtawpin an bawhzui dawn tih a sawi a ni.
ICT minister Dr.Vanlalthlana pawhin sawrkar laipui siam Bashini app-a Mizo tawng dah ve turin Bashini app chu inremna thu an thlunpui a, he app hian hmun leh hmunah tawng 22 a let chhuak thei tih a sawi a ni.