State pianna hi inremna thuthlung rah – Zoramthanga
State pianna hi inremna thuthlung rah
– Zoramthanga
Mizoram state a pianchhuah theih chhan chu MNF leh India sawrkar inremna thuthlung rah a ni a. Midangte state neih aiin Mizoram-in state a neih dan chu a changtlung zawk tih MNF president Zoramthanga chuan a sawi.
State Day pual thuchah a siamah MNF president chuan, 1987 February 20 khan union territory atangin dinhmun sang zawkah India ram state 23-na ni turin Mizoram hlankai a ni a. State Day-ah hian Mizoram state pianna kalkawnga kan theihnghilh ngai loh tur, ram leh hnam tana nunna hlu tak hlantute leh an theihna zawng zawng hlantute zahna chibai an buk thar tih a sawi a ni.
Mizoram state pianchhuahna chu MNF leh India sawrkar inremna thuthlung rah a ni, tiin, 1986 June 30 khan India sawrkar leh MNF chuan inremna thuthlung (Peace Accord) an ziak a. India ram aiawhin Union Home secretary RD Pradhan-a’n a hming a ziahhnan a, Zoram mipui aiawhin chief secretary Pu Lalkhama leh ramhnuai leh ram chhunga MNF aiawhin Pu Laldenga’n an ziahhnan bawk a. Hetihlaia chief minister Pu Lal Thanhawla pawhin remna atan hian a thawh hlawk hle tih a sawi.
“He remnaah hian tumah ralbang bik awm loin kan zavaiin kan tel a, a humhim pawh kan zavaia mawhphurhna a ni,” Zoramthanga hian a ti.
Peace Accord hlawhtling ber zing ami kan neih theihna kawngah Mizo mipui, kohhran, zirlai pawl, sawrkar hnathawkte leh Mizo National Front an tel vek avangin, Mizoram State Day chu Mizorama chengte tan bakah hmun hrang hranga cheng Mizo mipui tan a hlu em em tih a sawi a ni.
Midangte state neih aiin Mizoram-in state a neih dan a changtlung zawk a, a nghet zawk bawk, tiin, “Mizoram state chhunga chengte chuan state dang neih ang kan neih vek piah lamah humhimtu ILP, Peace Accord leh India danpui chhung ami – danpui lak atang pawha invenna, Mizoram tan bika special provision chuanna Article 371(G) kan nei lehzel a ni,” a ti.
India ram tan Republic Day leh Independence Day a hlut ang tluk zetin Mizote tan Mizoram State Day hi a hlu a; a hlutna hrerengin he Ni hi hmang reng thei ila a duhawm hle tih MNF president hian a sawi bawk.