Ei tur sawngbawl hnu fun/tuam that leh mipui hip zawnga tih dan tur zirtir

Sawrkar laipui Ministry of Food Processing Industries hnuaia FINER bultumin Inrinni khan Aizawlah ‘Regional Interaction Meet of Food Processing Industry’ neih a ni a. Adviser to chief minister (Handholding) Dr KC Lalmalsawmzauva leh MIFCO chairman Lalthazuala Royte bakah MSPCC member-te, Commerce & Industries Department-a thawktute, MzSRLM thawktute leh agriculture lama hmalatute leh sumdawnna bul tan tumte an tel.
Adviser to CM chuan Mizorama kuthnathawktute chu Bana Kaih Scheme hmangin thuam chak mek an ni tih sawiin, an thlai thar vawnthatna atan leh him dam taka thawnchhuah a nih theihnan he thutkhawm thupui “Packaging” chu thil pawimawh leh tangkai a ni tih a sawi.
Ei tur leh bungrua tuamna chu a chhung ami a vawnthat bakah customer-te hipna pawimawh tak a ni, tiin, a leitu turten an hriat tur pawimawh tak tak tarlanna a ni bawk tih a sawi a. Ei leh bara intodelh tur leh kuthnathawktute thlai tharchhuah man man zawka tihral thin a nih theihnan Mizoram sawrkar chuan Bana Kaih Scheme tangkai takin a hmang mek a. Phase-1 ah kuthnathawktuten Bana Kaih Scheme hnuaia thlai thlan bik – thar chhuah kawngah hmasawnna hmuh a ni tih a sawi. Phase 2-ah thlai tharte tha taka sawngbawl, ‘processing’ ah tan lak tum a ni tih a sawi.
Bana Kaih Scheme Phase-1 kalpui chhungin an bana an kaih ‘progress partner’ 392 hnenah loan pek a ni a; progress partner 2713 hnenah CM Special Package sem chhuah a ni a. Phase-2 kalpui mekah progress partner 917 thlan an ni leh tawh a, progress partner tha leh rintlak thlanchhuah hna hi kalpui mek zel a ni tih a sawi a ni.
Entrepreneur-te chu ‘processing’ an kalpui danah a packaging an uluk ang bawkin a chhunga eitur (product) awm pawh a hriselin a thianghlim hle tur a ni tih adviser to CM hian a sawi a. Insumdawntawnna chu rinawmnaa innghat a nih avangin sumdawng hlawhtling ni tur chuan taimak leh rinawmna vawng tlat turin a chah.
Regional Interaction Meet-ah hian FINER chief manager Amitabh Ray chuan MOFTI hnathawh dan a sawifiah a; New Product Development Manjushree Innovations Pvt. Ltd. manager Jyotismita Devi, Ganpati Packaging and Assembling (West Bengal) Dinesh Maurya, Saarthi Propack (Assam) executive assistant Puja Borah ten packaging chungchanga hriat tur powerpoint presentation hmangin an sawifiah a ni.