Lengpui ram hralh danah ZPM sawrkar inpuang mualpho zawk – Lalpianfela

Lengpui ram hralh danah ZPM sawrkar inpuang mualpho zawk – Lalpianfela
Indian Air Force hnena Lengpui-a ram hralh danah ZPM sawrkarin MNF sawrkar puh hmingchhiat tum mah se, anmahni zawk an inpuang mualpho zel niin MNF hruaitu Lalpianfela Chawngthu chuan a sawi.
Thawhtannia Mizo Hnam Run inkhawmah MNF Legal Board vice chairman Lalpianfela Chawngthu chuan, MNF sawrkarin no objection certificate a lo pe tawh nia ZPM-in an sawi fo chu, Lengpui ram hralhna tura an dan hman RFCLRR Act 2013 hnuaiah sawrkarin NOC a pek tur ziahna a awm loa, he dan hi MNF hian a hmang hman loa, NOC hi ZPM sawrkar hnuaiah 2024 April 29 khan ADC/RO counter sign thlap a awm tih a sawi a ni.
RFCTLARR Act 2013 Section 12 sawi angin preliminary survey of land tih a ni lo bawk tih sawiin, “Thil thleng ngai lo leh pawi em em chu, ram tin 105 chuang hmun acquire turah assessment zawng zawng ti zo vek turin Aizawl DC ni 15 chauh hun pek a ni a. Hei hi 2025 May 15-a preliminary notification-ah a inziak. MNF hian khulai ram khu ram ruak, ramro mai mai (barren land) an ti min ti a. Hei hi a dik lo an ti a nih chuan an dan hman RFCLRR Act 2013 section 12 angin land survey an ti tur a ni. A dik lo an tih chuan an siamtha mai tur a ni,” a ti.
Chuti ni loin, ZPM sawrkarin preliminary notification a chhuahah hian, Lengpui ram chu barren land a nih avang leh ram buai a nih loh vangin social impact assessment /resettlement tih ngai lo tih an ziak a. 2025 April 17-a notification a chhuah khan MNF sawrkar laia inbiakna leh indawrna awm tawh kha awmze nei lo, a bul tan that ngaiin a siam a. Anmahni leh anmahni an inpuang mualpho vel mai mai tih Legal Board vice chairman hian a sawi.
“Crop value leh structure value chhutchhuah a ni loa, Lengpui ramah khuan land value chauh assess a ni. In dinglai awmte chu a value assess a ni lo. ZPM sawrkarin an preliminary notification chhuahah ramruak hman tlak loh an tih miau avangin, RFCLRR Act 2013 hnuaiah dan ang thlapa Lengpui ram barren land puangtu chu ZPM sawrkar hi a ni. ZPM sawrkar hian 2025 May 27 khan RFCLRR Act 2013 hnuaia buildings, crops & plants hlutna chhut dan tur notification a tichhuak a. A zawm chuang lo,” a ti.
He ram laknaah hian interest chhut dan a dik lo nasa hle a, RFCLRR Act 2013 Section 30(3) bawhchhiat a ni tih Lalpianfela Chawngthu hian a sawi.
Revenue minister-in preliminary notification chhuah – 2025 May 15 atanga chhiara ni 62-naah Revenue department-in final land acquisition notification a tichhuak, tia a sawi thu sawichhawgin, ni 62 chhung vel interest chhut tur a nih laiin, kum khat atan chhut a ni a. Lengpui bikah an ram lak pumpui atana ni 70 interest tur chu Rs. 1,97,07, 393.73 a nih laiin, ZPM sawrkarin interest a approve zat chu Rs. 10,27,59, 981.60 a ni. Dan pela ZMP sawrkarin interest a pek zat hi Rs. 8,30,52, 587.85 a ni, tiin a sawi.
“Tunhma zawng khan DC office hian dik taka interest chhut dan an thiam em em thin a, ZPM sawrkar hnuaia an thiam ta lo thut hi a mak. Tih fuh tawk loh awm palh a nih pawhin DC office-in draft award a thehluh hnuah sawrkarin a dik leh dik loh a lo enfiah tur a ni a. Mahse, sawrkar hian a dik leh dik loh a en lo nge, an pawm hmiah mai hi thil thleng lo tura kan duhthusam leh vawiin thlenga min la barakhaihtu a ni,” a ti.