Taylor Swift-in No.1 singles 14 a nei tlingin Rihanna a nih rual

Taylor Swift hla ‘Opalite’ chu Billboard Hot 100 (US singles) chart-ah No.1 a kai a, tihian he chart-a No.1 kai thei hla 14 a nei tling ta a, Rihanna nih rualin, chart No.1 hla ngahah pathumna niin, The Beatles leh Mariah Carey te chiah a pha lo. The Beatles hi Hot 100-a No.1 kai thei hla ngah ber niin, hla 20 an nei a, Mariah Carey hian No.1 kai thei hla 19 a nei tawh bawk.
Taylor Swift hla he chart-a No.1 kai 14 zinga hla pakua te chu 2020 hnulama mi vek an ni a, Swift hi 2020 hnulamah chuan Hot 100-a No.1 kai thei hla ngah ber a ni a, a hnaih bertu chu Drake niin, ani hian 2020 hnuah No.1 kai thei hla pasarih a nei tawh a, BTS leh Ariana Grande ten paruk ve ve an nei tawh bawk.
Hetihrual hian Opalite hi a album ‘The Life of a Showgirl’ atanga Hot 100 chart-a No.1 kai thei hla pahnihna niin, album pakhat atanga Hot 100 No.1 kai thei hla pakhat aia tam album a neih vawi hnihna a ni a, a album dang ‘1989’ atangin Hot 100 a No.1 kai thei hla pathum a nei a, heng album pahnih tih loh, a album dang zawngah hian Hot 100 No.1 kai thei hla pakhat bak a nei ngai lo a ni.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
‘Opalite’ hian kar khat chhungin stream maktaduai 11.4, radio airplay ngaithlatu maktaduai 58.9 leh sales 1,68,000 neiin chart No.2 atangin No.1 a kai ta a, he chart-a a hla No.1 kai thei 14-na niin, Hot 100 chart history-a No.1 hla ngahah pathumna a ni ta a ni.
‘Opalite’ hla hi Swift, Max Martin leh Shellback ten an phuahho a ni a, Swift hian Hot 100 No.1 kai thei hla 14 a phuah tling ta a, No.1 kai thei hla pariat a produce tawh bawk. Max Martin hian No.1 kai thei hla 29 a phuah tlinna a ni ve thung a, Paul McCartney (32) chiah a pha lo a, Shellback tan Hot 100 No.1 kai thei hla 12 a phuahna a ni ve thung. Swift, Martin leh Shellback te hian Swift album ‘1989’ atanga Hot 100 No.1 kai thei hla pathum- “Shake It Off,” “Blank Space” leh “Bad Blood,” te an lo phuahho tawh bawk.
Chart No.1 hlui, Ella Langley hla zinga he chart-a No.1 kai thei hmasa ber “Choosin’ Texas” chu No.4 atangin No.2 a kai thar leh ta a, Olivia Dean “Man I Need” chu No.3-ah bawk a la awm a, chart No.1 hlui Bad Bunny ‘DtMF” chu No.1 atangin No.4-ah a tawlh a, chart No.1 hlui Alex Warren “Ordinary” chu No.6 atangin No.5 a kai thar leh ta bawk.
Chart No.1 hlui Bruno Mars “I Just Might” chu No.10 atangin No.6 a kai thar leh a, chart No.1 hlui HUNTR/X “Golden” chu No.9 atangin No.7 a kai thar leh ta a, chart No.1 hlui tho Taylor Swift ‘The Fate of Ophelia” chu No.12 atangin No.8 a kai thar leh ta a, Nad Bunny “Titi Me Pregunto” chu No.7 atangin No.9-ah a tawlh a, Bad Bunny hla dang ‘Baile Inolvidable’ chu No.2 atangin No.10-ah a tawlh ta bawk.
Hot 100 No.1 hla ngah zualte chu:
20, The Beatles
19, Mariah Carey
14, Rihanna
14, Taylor Swift
13, Drake
13, Michael Jackson
12, Madonna
12, The Supremes
11, Whitney Houston
10, Janet Jackson
10, Bruno Mars
10, Stevie Wonder