Mizo Short Film Competition 2026 winner – ‘Maimizial’- Raymond Colney
Mizo Short Film Competition 2026 winner – ‘Maimizial’- Raymond Colney
Mizo Short Film Competition 2026 lawmman dawngtu an puang ta, Raymond Colney chuan a film siam ‘Maimizial’ avangin lawmman pakhatna a dawng a, H Lalsangzela (Zote Entertainment) chuan ‘Zualtei Pa’ film avangin lawmman pahnihna a dawng a, Lalrohlua Renthlei (Phaidung Studio) chuan ‘Nunna’ film avangin lawmman pathumna a dawng bawk.
Mizo Short Film Competition 2026 atan hian February ni 16, 2026 thleng khan minute 10-15 a sei, Film 41 a lut a. Judge-ten uluk taka an endik hnuah niminpiah khan result hi puan a ni. Pakhatna hian lawmman Rs 2,50,000 dawngin, pahnihna leh pathumna ten Rs 1,25,000 leh Rs 70,000 an dawng a, mi panga hnenah consolation prize Rs 30,000 theuh hlan an ni bawk. Consolation prize dawngtu te chu – ‘Chanchinbumi’- Christo Pa, ‘Noodles soup’ – Margaret B.Lalmuanawmi, ‘Vindicta’ – David Sanga, ‘The Unforgiven Silence’ – Ruatfela Mart Khiangte leh ‘Thangthawvenga’ – Hruaitea Hauhnar te an ni.
February ni 24 chawhnu lam khan Mini Theatre, Lianchhiari Run, Directorate of Information & Public Relations, Treasury Square, Aizawlah I&PR leh Mizoram Film Development Committee bultuma buatsaih, film tawi siam inelna hmawrbawkna hun hi hman a ni a, he inelnaah hian film tawi 41 thehluh niin, B.Lalchhanzova, Minister, IPR & PS chuan lawmman semna hun a hmanpui a. K.Vanlalsangi, Director chuan lawmman semna hun hi kaihruaiin, Betsy Zothanpari Sailo, Secretary chuan film tawi hmanga inelna chungchang report tawi a pe bawk.
IPR&PS Minister Pu B.Lalchhanzova chuan Film tha chu thil tithei tak, a thlirtu ngaihtuahna, a tha zawng leh tha lo zawnga hruai kawi thei a nih thu a sawi a. Film siam chhuah tam satliah ni lovin, film tha siam chhuah thiam a pawimawh thu a sawi bawk. Minister chuan I&B Ministry atangin, Mizorama film lama tui mite tihhmasawnna turin ‘Lemchan- Mizo Film Festival’ tih chu March ni 16 -18 chhung buatsaih tum a nih thu a tarlang a. Film siam leh a khaihhnawih hrang hrangte, eizawnnatlaka kan siam zel theih nan he festival hi tangkai taka kan hman thiam a pawimawh thu a sawi bawk.