Rock & Roll Hall of Fame 2026 Nominee-ah Mariah Carey leh Shakira an tel
Rock & Roll Hall of Fame 2026 Nominee-ah Mariah Carey leh Shakira an tel
Rock & Roll Hall of Fame-a kumina seng luh tura thlan theih, nominee-te an puang ta a, mi 17 hming an puang a, tun hnaia nomination-a an tam ber a la ni a, 14-15 vel nomination-ah an lang tlangpui thin. Kumin nominee 17 zinga 10 chu nomination-a an lang vawi khatna niin, midang zawng chu vawi khat aia tam lang tawh an ni.
Kumin nominee-te hi genre hrang hrang atangin an fuankhawm a, pop singer-songwriter Mariah Carey, pop-rock atangin Phil Collins, blues-rocker The Black Crowes, punk atangin Billy Idol, heavy metal atangin Iron Maiden, 80sstar INXS, singer-songwriter Jeff Buckley, post-punk atanga dance lama kal Joy Division/New Order, R&B vocal group New Edition, Britpop Oasis, pop star P!NK, R&B group Sade, Colombian pop star Shakira, R&B legend Luther Vandross leh Wu-Tang Clan te an ni.
Rock Hall nomination-a lang thei tur hian artist te chu an commercial recording hmasa ber atanga kum 25 a tlin phawt a ngai a, P!NK hi a album hmasa ber ‘Can’t Take Me Home’ kha 2000-a a tlangzarh niin, kumin hi nomination-a a lan theihna hmasa ber a ni a, ani hi nominee zinga tharlam ber a ni, Lauryn Hill pawh a vawi khat lanna niin, 1998 khan a solo debut album ‘The Miseducation of Lauryn Hill’ a tlangzarh a, Grammy award-ah album of the year a dawn pui nghe nghe. Jeff Buckley, Wu-Tang Clan, Melissa Etherridge, Luther Vandross, Phil Collins, INXS leh Shakira te pawh nomination-a an lan vawi khatna a ni.
Phil Collins hi solo artist angin a vawi khat nan nominate a ni a, an group Genesis ang chuan Rock Hall-ah hian lak luh an ni tawh a, kumin hian lak luh a nih chuan Rock Hall-a tum khat aia tam lak luh ni thei 29-na a ni ang.
Mariah Carey hi nomination-ah a vawi thum lanna niin, 2024 leh 2025-ah te a lang tawh a, Iron Maiden pawh 2021 leh 2023-ah lang tawhin, Joy Division/New Order te pawh 2023 le 2025-ah lang tawhin, Oasis pawh 2024 leh 2025-ah an lang tawh a, Black Crowes leh Billy Idol te hi tum hnih an lanna a ni ve thung.
2026 Rock Hall-a lak luh turte chu ballot hmanga thlan an ni dawn a, international panel, artist, historian le music industry professional 1,200 chuangin vote hmangin an thlang dawn a, fans vote pawh final tally-ah chhiar tel a ni ang. Rock Hall Class of 2026 hi April thlaa an puang ang.