Buaina a siam hnu ah CM-in a pha kual

On Mar 2, 2026 1 0

Buaina a siam hnu ah CM-in a pha kual
– Congress Thalai
Assembly Session-a dan siamthatna tur a sawihawnnaah chief minister-in mi rilru a hliam hnu ah midang puh tumin a pha kual leh tih Congress Thalai chuan an sawi a, mawhphurhna la ngam lo a nih zia a lantir tih an sawi.
Congress Thalai Hqrs. thuchhuak chuan, Assembly thutkhawma chief minister bill putluh ‘The Mizo Marriage and Heritance of Property (Amendment) Bill 2026’ a sawihawnnaah Mizo hmeichhia diriamna, hmuhsitna leh dahhniam luihna, Mizo hmeichhiain kawppui /pasal atana hnamdang a neih chuan Mizo a nihna a tawp nghal, tih a sawi thu sawichhawngin, bill puluttu berin a sawi chu thutak, sawrkar thuchhuaka ngaih a ni tih a sawi.
Chief minister Pu Lalduhoma hian Mizo hmeichhia, nu leh pa leh an chhungte rilru a hliam na hle nia sawiin, he a thusawi hian court sang ber pawhin a tih danglam theih loh, tih hial, India Constitution-a Fundamental Rights Article 14, 15 leh 21 a kalh tih a sawi bawk.
‘Hetianga Mizo hnam buaina a siam hnuah dawihzep takin mawhphurhna la ngam lo chief minister a nihzia lantirin Pu Lalduhoma hian, civil society leh he Bill draft Review Committee tih angin House-ah dan kalhin a pha kual leh a. MHIP Gen. Hqrs-in he bill leh a sawi dan chu Mizo hmeichhiate tan him lo leh tha tawk loa an ngai pawh hi a dik reng a. Chief minister leh ZPM sawrkar kalphung hi Congress Thalai chuan hmalakna tha lo leh Mizo min thendarhtu hmanrua, mahni thu zuk ching an nih zia leh midang puh kuala mawhphurhna la ngam lo, lal duh hrim hrim sawrkar an nih zia a nemnghetah kan ngai,’ a ti.
Pu Lalduhoma chu police-te pawh Tuirial by-election campaign-naah leh Assembly House-ah ‘kut vung ber bur, ke vung ber bur, PSO atan pawha kan duh loh,’ tia lo sawi chhuak tawhah Congress Thalai hian puhin, a hnu ah a sawi ni loin, midang sawi a sawi angin an thehdarh a; opposition leader sawi zawk niin a sawi leh tih a sawi bawk.
‘Hetiang taka House leh ram rorelna kalpui hi Congress Thalai chuan pawi a ti a. Mizoram rorelna sang ti bawrhbang tawh lo turin chief minister Pu Lalduhoma kan ngen a ni,’ a ti.